Qazaqstandaǵy áskerı oqý oryndarynda daıarlyq baǵdarlamalary qaıta qaralady
Qorǵanys mınıstrliginiń alqa májilisinde kóterilgen máselelerge toqtalǵan A. Ótepov: «Májiliste qysqy oqý kezeńindegi jalpy qyzmettiń, jaýyngerlik jáne jumyldyrý daıyndyǵynyń, tyldyq jáne tehnıkalyq qamtamasyz etýdiń qorytyndylary shyǵaryldy. Áskerı tártip pen quqyqtyq tártip jaǵdaıy da taldandy. Qysqy oqý merziminde bólimsheler tekserilgen bolatyn. Sonymen qatar, túrli oqý-jattyǵý ótkizilgen edi», - dedi.
Onyń aıtýynsha, qazirgi kezde tehıka men qarý-jaraqty jańartý men jóndeý jumystary júrip jatyr.
«Atap aıtqanda, qysqy oqytý merziminde qoıylǵan basty maqsattar men mindetter oryndaldy dep esepteımiz. Qorǵanys mınıstri Rýslan Jaqsylyqov barlyq garnızondy aralap shyqqan bolatyn. Osy oraıda, vedomstvo basshysy garnızondardaǵy áskerlerdiń naqty jaǵdaıyn jaqsy biledi. Tárbıe ári ıdeologııa jumystaryna baılanysty máseleler kóterildi. Mınıstr jaýyngerlik daıarlyqtyń oqý-materıaldyq bazalaryna erekshe nazar aýdaryp, oqytý synyptary men jattyǵý polıgondaryn synǵa aldy», - dedi A. Ótepov.
Sonymen qatar, ol alqa májilisinde áskerı ınfraqurylymnyń jaǵdaıy egjeı-tegjeıli qaralǵanyn jetkizdi. Qorǵanys mınıstri sarbazdar kazarmalary men ashanalarynyń jaǵdaıyn tıisti normalarǵa saı keltirýin talap etti.
«Vedomstvo basshysy Qarýly kúshterdegi tárbıe jáne ıdeologııa jumystaryn túbegeıli qaıta qurý týraly, sondaı-aq jaýyngerlik daıarlyq baǵytynda oqý-jattyǵý oryndary men polıgondaryn qalpyna keltirýge qatysty naqty tapsyrma berdi. Munymen qosa, rota starshınasy qyzmetin qaıta engizý tapsyrmasy júkteldi. Mınıstr joǵary áskerı oqý oryndarynda oqý baǵdarlamalaryn qaıta qarastyrýdy usyndy», - dedi Alpamys Ótepov.
Qorǵanys vedomstvosynyń alqa otyrysynda el Prezıdenti – Qarýly kúshterdiń Joǵarǵy Bas qolbasshysy Qasym-Jomart Toqaev bergen tapsyrmalardy oryndaý aıasynda eseptik kezeńdegi qyzmettiń qorytyndysy shyǵaryldy.