Qazaqstandaǵy aqyly joldar 100 mln. teńge tabys ákeldi

ASTANA. QazAqparat - Qazaqstandaǵy eń alǵashqy «Astana - Shortandy» baǵytyndaǵy aqyly avtokólik joly 2014 jyly memleket bıýdjetine 1 mln. 258 myń 200 teńge túsim ákeldi. Al, bir jylda atalǵan jol ýchaskesin kútip ustaýǵa, aqyly júıeniń jumysyna jáne dıspetcherler men operatorlardyń eńbekaqysyna 1 157,3 mln. teńge jumsalǵan. Sonyń nátıjesinde aqyly joldan túsken 100,9 mln. teńge joldyń 7-shi jolaǵyn damytýǵa jumsalǵan. Bul jolaqta avtokólikterden aqy alatyn jabdyqtar, meteorologııalyq qurylǵylar, jyly dárethanalar ornalasady. Bul týraly Májilis depýtattaryna «QR-nyń keıbir zańnamalyq aktilerine jol-kólik ınfraqurylymyn, kóliktik logıstıkany jáne avıatasymaldaýdy damytý máseleleri boıynsha ózgerister men tolyqtyrýlar engizý týraly» zań jobasyn tanystyrǵan Investıtsııalar jáne damý mınıstri Áset Isekeshev málimdedi.

Mınıstrdiń aıtýynsha, osylaısha aqyly joldy engizýdiń alǵashqy tájirıbesi tas joldy kútip ustaýǵa qajetti shyǵyndardy joldyń ózi óteı alatynyn kórsetti. Bul tásil bir jaǵynan avtojoldardy paıdalanýshylardyń qajettilikterin tolyqtaı qanaǵattandyrady, ekinshi jaǵynan bıýdjetke túsetin qarjylaı salmaqty azaıtady. «Qazirgi kezde «Astana - Shortandy» aqyly jol ýchaskesinde jergilikti jeńil avtokólikterge jylyna 1000 teńge kóleminde abonenttik aqy belgilengen. Oǵan qosa, osy zań jobasynda jekelegen kólik sanattaryna joldan tegin júrip ótý qarastyrylyp otyr. Ondaı sanattarǵa: arnaıy avtokólikter, aqyly joldy basyp ótetin baǵdarlyq avtobýstar, aýdan aýmaǵynda qozǵalatyn avtokólik quraldary jatady»,- dep túsindirdi Á. Isekeshev.

Atap aıtarlyǵy, Qazaqstanda 2013 jyly avtokólik salasyn reformalaý is-sharalary júzege asyryldy. Sonyń nátıjesinde avtokólik joldaryn basqaratyn Ulttyq operator quryldy. Osy operatordyń qyzmetin jetildirý maqsatynda Bıýdjet kodeksi men «Avtokólik joldary týraly» zańǵa túzetý engizý usynylýda. Mundaı túzetýler ulttyq operatorǵa memlekettik emes qaryzdardyń aqshasyn tartý úshin, memleketten kepildik alýǵa múmkindik beredi. Túptep kelgende, Ulttyq operatorǵa avtokólik joldaryn kútip ustaýǵa jáne jol boıyndaǵy servısti damytýǵa, ınvestıtsııalar tartýǵa, aqyly joldyń esebinen ınvestordyń bergen qaryzyn qaıtarýǵa quzyret beriledi.

Investıtsııalar jáne damý mınıstrliginiń baspasóz qyzmeti habarlaǵandaı, Qytaı Halyq Respýblıkasynyń EksImBankiniń 2,6 mlrd. dollar kólemindegi memlekettik emes qaryz aqshasyna Qazaqstandaǵy jalpy uzyndyǵy 1963 shaqyrym avtokólik joldaryn jóndeýden ótkizý usynylýda. Atap aıtqanda, bul «Taldyqorǵan - Qalbataý - Óskemen» jol ýchaskesiniń 767 shaqyrymy, «Qalbataý - Maıqapshaǵaı» baǵytyndaǵy 404 shaqyrym jol, «Merke - Býrabaıtal - Aqsúıek» baǵytyndaǵy 328 shaqyrym, «Úsharal - Dostyq» baǵdarynyń 184 shaqyrymy jáne «Almaty - Sholpan-Ata» arasyndaǵy 280 shaqyrym jol. Sheteldik bank usynǵan shart boıynsha, negizgi qaryz 20 jyldyń ishinde tolyq qaıtarylady. Sonyń ishinde qaryz aqsha aqyly avtokólik joldarynan túsken túsimniń esebinen jyldyq 2 paıyzdyq mólsherlememen tólenedi.