Qazaqstandaǵy AQSh elshisi vaktsınadan keıingi jaı-kúıin aıtty
«Aldymen qasıetti Ramazan aıynda jyly tilekterimdi bildirgim keledi. Oraza qabyl bolsyn! Birge jınalyp, kóptegen rızyqtarǵa shúkirshilik etýdiń jáne aramyzdan ketken adamdardy eske alýdyń mańyzdylyǵy bıyl erekshe seziledi. Aldaǵy Ramazan aılarynda áleýmettik qashyqty saqtap, maska taǵý qajettigi bolmasyn dep shyn júrekten tileımin. Bul taqyrypta men optımıstik kózqarastamyn, biz pandemııany jeńýge jaqyndap qaldyq. Vaktsınalar búkil álemde, sonyń ishinde AQSh elshilikterinde de salynyp jatyr. Men ózim alǵashqy dozany ótken aptada aldym jáne múmkindiginshe barlyq qazaqstandyqtardy vaktsına alýǵa shaqyramyn», - dedi Ý. Mozer AQSh elshiligi uıymdastyrǵan onlaın dóńgelek ústelde.
Elshi amerıkalyq Moderna vaktsınasyn alǵan jáne ekpeden keıingi jaı-kúıin aıtyp berdi.
«Men Moderna vaktsınasyn aldym jáne ekpeden keıin sol qolymnyń aýyrsynǵanyn baıqadym. Biraq, men ekpeni oń qolyma alǵan edim, bul shyndyq. Kelesi kúni shanshý bolǵanyn sezdim, basqa eshqandaı áseri baıqalmady. Balalarym da Moderna jáne Pfizer vaktsınalaryn aldy, olar ekinshi ekpeden keıin janama áser kóbirek bolatynyn aıtýda. Biraq, qorqatyn jaıt emes, az ǵana ýaqytqa álsizdik sezilýi múmkin», - dep jaýap berdi elshi jýrnalıster suraǵyna.
Sonymen birge, Ý. Mozer AQSh-taǵy vaktsınalaý jumystary jóninde baıandady.
«Dúısenbi kúni AQSh úshin óte mańyzdy kún boldy. Óıtkeni, bizdiń prezıdent Baıden myrza 19 sáýirden bastap, 16 jasqa tolǵan árbir eresek azamattyń vaktsına alatynyn málimdedi. Elde vaktsına kólemi jetkilikti jáne shamamen jazdyń sońyna deıin ujymdyq ımmýnıtetke qol jetkizetin shyǵarmyz. Qazaqstanda da tezirek ujymdyq ımmýnıtet bolýyn tileımiz. Eger sizde vaktsına alatyn múmkindigińiz bolsa, ótinemin, alyńyz. Óıtkeni bul elińiz úshin, ózińiz úshin jáne búkil álemniń saýlyǵy úshin óte mańyzdy», - dep qorytyndylady AQSh elshisi.