Qazaqstandaǵy ahýalǵa arnalǵan Túrki memleketteri uıymynyń tótenshe otyrysy ótti

NUR-SULTAN. QazAqparat - Túrki memleketteri uıymynyń is basyndaǵy tóraǵasy – Túrkııanyń bastamasymen uıymnyń Syrtqy ister mınıstrleri keńesiniń tótenshe otyrysy ótti. QazAqparat bul týraly QR Syrtqy ister mınıstrliginiń málimetine silteme jasap habarlaıdy.

Beınekonferentsııa formatynda ótken otyrystyń kún tártibinde Qazaqstandaǵy sońǵy ahýal talqylanyp, birlesken málimdeme jasaldy.

Málimdemede mınıstrler qajet bolǵan jaǵdaıda qazirgi daǵdarysty eńserý úshin Qazaqstan halqy men úkimetin qoldaýǵa daıyn ekendikterin rastady.

Sonymen birge, Qazaqstan Prezıdenti Qasym-Jomart Toqaevtyń Qazaqstan halqynyń ál-aýqaty men órkendeýin odan ári arttyrýǵa baǵyttalǵan reformalar baǵdarlamasyn jáne konstıtýtsııalyq tártipti buzýǵa umtylǵan terrorısterge, radıkaldarǵa, ekstremıster men qylmyskerlerge qarsy Qazaqstan Úkimetiniń terrorızmge qarsy operatsııalaryn qoldaıtyndaryn málimdedi.

Aıta keteıik, Túrki memleketteri uıymy Qazaqstannyń bastamasymen 2009 jyly 3 qazanda quryldy, Halyqaralyq uıymnyń shtab-páteri Ystanbul qalasynda ornalasqan. Uıymǵa Qazaqstan, Ázerbaıjan, Qyrǵyzstan, Túrkııa, Ózbekstan múshe, al Majarstan men Túrikmenstan baqylaýshy mártebesine ıe.