Qazaqstandaǵy 98 arnaıy mekteptiń bári qaıta jabdyqtaýǵa muqtaj - Bolat Jámishev

NUR-SULTAN. QazAqparat – «Qazaqstan halqyna» qory qyrkúıek aıynda azamattyq qoǵam ókilderimen, «Qazaqstan halqyna» qorynyń donorlarymen onlaın konferentsııa ótkizedi. Bul týraly qordyń tóraǵasy Bolat Jámishev Aqordada aıtty, dep habarlaıdy QazAqparat.

Aıta keteıik, búgin Memleket basshysy Qasym-Jomart Toqaev «Qazaqstan halqyna» qorynyń tóraǵasy Bolat Jámishevti qabyldady.

«Qazirgi ýaqytta qor 10 jobany júzege asyryp jatyr. Negizinen bul medıtsına salasyndaǵy jobalar, sondaı-aq erekshe balalardy áleýmettik ońaltý, medıtsınalyq ońaltý, aýyl mektepterindegi bilim deńgeıin kóterýge qatysty jobalar bar. Arnaıy mektepterdi jabdyqtaý boıynsha da sharalar atqarylady. Qazaqstanda 98 arnaıy mektep bar, olardyń bári qaıta jabdyqtaýǵa muqtaj. Biz sırek kezdesetin aýrýlarmen aýyratyn balalardy dári-dármekpen qamtý baǵytynda da jumys istep jatyrmyz. Budan da basqa jobalar týraly Prezıdentke baıandadym», - dedi Bolat Jámishev Aqordada bergen suhbatynda.

Onyń aıtýynsha, Prezıdent qordyń tujyrymdamasyn qalyń kópshilikpen taǵy bir talqylaý qajettigin usynǵan.

«Meniń oıymsha, bul búgingi kúnniń ózekti mindeti. Áli de qor jumys isteýi qajet birqatar baǵyt bar ekeni anyq. Bul baǵyttar azamattyq qoǵam ókilderimen, «Qazaqstan halqyna» qorynyń donorlary bolǵan memlekettik organdardyń ókilderimen birge aıqyndalsa jaqsy bolar edi. Biz qyrkúıek aıynyń basynda osy qurylymdardyń ókilderimen úlken onlaın konferentsııa ótkizemiz», - dedi Bolat Jámishev.