Qazaqstandaǵy 3200 saıası laýazymdy qyzmet 430-ǵa deıin qysqardy
Búgin Astanada QR Prezıdenti janyndaǵy Ortalyq kommýnıkatsııalar qyzmetiniń dástúrli aptalyq brıfıngisinde Memlekettik qyzmet isteri agenttiginiń tóraǵasy Álıhan Báımenov osylaı málim etti.
«Memlekettik qyzmetshilerdiń laýazymdarynyń jańa tizilimi bekitilgen bolatyn. Este bolsa, Elbasy N. Nazarbaev saıası memlekettik qyzmetshilerdiń sanyn 8 esege qysqartý týraly tapsyrma bergen edi. Osyǵan saı, 430-ǵa jýyq saıası laýazym qaldy. Buryn bul 3 myń 200-den astam bolatyn», - dedi Á. Báımenov.
Onyń sózine qaraǵanda, atalmysh tizilimmen «A» basqarýshy korpýsynyń quramy da bekitilip otyr. Onyń eń joǵary deńgeıine jaýapty hatshylar, apparat jetekshileri, Úkimet keńsesiniń, Májilis pen Senat apparatynyń bólim meńgerýshileri, Prezıdent Ákimshiliginiń sektor meńgerýshileri enedi. Budan bólek, «A» basqarýshylar laýazymyna aımaqtardan barlyq aýdan, qala ákimderi, óńirlerdegi tekserý komıssııalarynyń músheleri kiredi. «A» basqarýshylyq korpýsyna arnaıy biliktilik talaptary da bekitilgen. Bul bilimine, eńbek ótiline, laýazymyna baılanysty qosymsha talaptar bolyp tabylady.
«Sonymen qatar, Ulttyq komıssııa jóninde jarlyq qabyldanyp, «A» korpýsyna irikteý erejeleri bekitildi. Sol úshin búginnen bastap «A» korpýsynyń laýazymyn alam degen azamattar Ulttyq komıssııa jasaqtaıtyn rezervterge enýi shart. Bul barlyq azamattarǵa teń, ıaǵnı búgingi kúni sol laýazymdy atqaryp jatqandar da, syrttan qatysýǵa nıettiler de teńdeı qabyldanady. Al búgingi jumys jasap otyrǵan azamattar ózderin taǵaıyndaǵan tulǵalarmen eńbek shartyna otyrady. Eńbek shartynyń eń uzaq merzimi jarty jyl», - deıdi Á. Báımenov.