Qazaqstandaǵy 32 banktiń 19-ynda jeke tulǵalardyń salymdary ulǵaıdy

ASTANA. QazAqparat - Qazaqstandyq bankterdiń depozıttik portfelderiniń jartysynan kóbi jekelegen salymdardan turady. Qazaqstandyqtar jekelegen  salymdarynyń jartysyn teńgede ustaıtyn bolyp shyqty, dep habarlaıdy QazAqparat tilshisi ranking.kz ">ranking.kz saıtyna silteme jasap.

Belgili bolǵandaı, ekinshi deńgeıli bankterdiń jekelegen salymdary sońǵy jyl ishinde 7,5 paıyzǵa (593,6 mlrd teńge) ósip, 2018 jyldyń sońyna 8,5 mtrln teńgeni quraǵan. Jalpy salym somasy nebári 0,3 (58 mlrd) paıyzǵa ósip, 16,9 trln teńge bolǵan.

«Nátıjesinde jekelegen salymdardyń úlesi bir jylda 46,9 paıyzdan 50,2 paıyzǵa deıin ósken. Osylaısha jeke tulǵalardyń depozıtteri ekinshi deńgeıli bankterdiń qorlandyrýdyń negizgi kózi bolyp qala beredi», delingen habarlamada.

Qazaqstan Respýblıkasynyń 32 bankiniń 19-y jeke tulǵalardyń salymdarynyń mólsherin ulǵaıtqan. Kaspi Bank-tyń salymdary 956,6 mlrd teńgeni qurap, 163,7 mlrd teńge  (20,6 paıyz) kólemindegi ósimmen kósh bastap keledi. Ekinshi deńgeıli bankterdiń úlesi 10,1 paıyzdan 11,3 paıyzǵa ósken. Kelesi kezekte Qazkom banki tur. Ondaǵy salym mólsheri 1,4 trln teńgege jetip, 126,5 mlrd (9,8 paıyz) qosqan. QR ekinshi deńgeıli bankteriniń úlesi 16,4 paıyzdan 16,8 paıyzǵa kóterilgen. Úzdikter úshtigin Halyq bank túıindeıdi. Ondaǵy salym sólsheri 109,3 mlrd teńgege ósip, 1,7 trln teńgeni quraǵan. QR ekinshi deńgeıli bankteriniń úlesi 20,8 paıyzdan 20,6 paıyzǵa qysqarǵan.

Basylym sońǵy jyly ulttyq valıýtadaǵy salymdardyń úles salmaǵynyń 45 paıyzdan 52,9 paıyzǵa artqanyn jetkizedi. Buǵan deıin 4 jyl boıy jekelegen salymdar portfelinde sheteldik valıýtadaǵy depozıtterdiń sany basym bolǵan.