Qazaqstandaǵy 3 munaı óńdeý zaýytynyń qaýqary qandaı

ASTANA. QazAqparat - QR Energetıka mınıstri Qanat Bozymbaev eldegi úsh munaı óńdeý zaýyttarynyń jumys josparyn baıandady, dep habarlaıdy QazAqparat tilshisi.

Onyń aıtýynsha, qarasha aıynda elge 270-280 myń tonna benzın qajettiligi týyndaıdy.

«Onyń basym bóligin elimizdegi úsh MÓZ esebinen tolyqtyramyz. Kólemder boıynsha kesteni búgin-erteń naqty bekitetin bolamyz. Degenmen Shymkent pen Pavlodar zaýyttaryn barynsha qamtyǵymyz keledi», - dep jaýap berdi jýrnalıster suraǵyna mınıstr OKQ-de ótken baspasóz máslıhatynda.

Bozymbaev Atyraý MÓZ júktemesin azaıtý josparlanǵanyn jetkizdi. Bul jeltoqsan aıynda zaýytqa katalıtıkalyq krekıng (munaıdy óńdep, benzın, mazýt t.b. shyǵarý) qondyrǵysyn ornatýmen baılanysty. 

«Ashyq tústi munaı ónimderin óndirý kólemi shapshań artýy tıis jáne zaýyt anaǵurlym tıimdirek jumys isteıdi, shıki munaıǵa qazirgiden de kóbirek tóleıtin bolady», - dep tolyqtyrdy óz sózin Bozymbaev.

Buǵan deıin mınıstr Pavlodar MÓZ iske qosylǵanyn, úsh kúnnen keıin daıyn benzın shyǵarylatynyn málimdegen edi.