Qazaqstandaǵy 100-den astam bazarda baǵa boıynsha tekserý júrip jatyr

NUR-SULTAN. QazAqparat – Eldegi 127 kóterme jáne bólshek saýda bazarynda baǵany baqylaýǵa arnalǵan tekserýler júrip jatyr, dep habarlaıdy QazAqparat tilshisi.

Bul jóninde Májilistiń jalpy otyrysynan keıin BAQ ókilderine bergen suhbatynda QR Premer-Mınıstriniń orynbasary – Saýda jáne ıntegratsııa mınıstri Baqyt Sultanov aıtty.

«Inflıatsııaǵa qarsy sharalar qabyldadyq. Onyń biri baǵany turaqty ustap turýǵa baǵyttalǵan. Munyń aıasynda 67 shara kózdelgen. Júıeli sharalar ónimderdiń tapshylyǵyn boldyrmaýdy, sapaly bolýy jáne baǵa boıynsha qoljetimdi bolýyn qamtıdy. Bul baǵytta Aýyl sharýashylyǵy mınıstrliginiń baǵdarlamasy qatar jumys istep jatyr. Ol baǵdarlama qajetti ónimdermen orta merzimde qamtamasyz etýge baǵyttalǵan. Azyq-túlik ónimderimen 100 paıyz qamtamasyz etip, 6 ımporttyq taýardyń baǵasyn túsirý jáne ımportqa táýeldilikti barynsha azaıtý josparlanyp otyr»,- degen mınıstr «Egisten sórege deıin» atty joba da máselege arnalǵanyn eske saldy.

Aıtýynsha, azyq-túlik baǵasyn 15 paıyzdyq mejeden ósirmeı ustap turý úshin, tipti aýdan ortalyqtarynda da tekserý bastalyp ketken.

«Óńirlerde arnaıy shuǵyl sharalar júrip jatyr. Kóterme bazarlardy tekserýge berilgen moratorııdiń alynyp tastalýyna baılanysty 127 kóterme jáne bólshek bazarda arnaıy tekserýler júrgizilip jatyr.

Odan bólek baǵany el arasyndaǵy dúrligýdi paıdalana otyryp kóterý máselesi bar. Bul máseleni monıtorıng toptardyń kómegimen sheship jatyrmyz. Búginde aldyna ala aralap, zańmen bekitilgen 15 paıyzdyq mejeden artyq baǵany kóterýge bolmaıtyny týraly eskertý jasaldy. Sonyń aıasynda oblys ortalyqtaryndaǵy aýla dúkenderiniń 85 paıyzyn qamtydyq. Ótken aptadan beri mundaı tekserýler aýdan ortalyqtarynda da bastaldy. Munyń báriniń óz nátıjesi bolady dep oılaımyn.

Onyń ústine aınalym qarajatyn arttyrý úshin qosymsha 100 mlrd teńge bólindi. Turaqtandyrý qorlarymen de juys istep jatyrmyz. Osyndaı keshendi sharalardyń arqasynda jyldyq esepte baǵa ósimin 10 paıyz kóleminde ustap turý múmkin bolyp otyr», - dedi Baqyt Sultanov.

Aıta keteıik, Májilistiń jalpy otyrysynda QR Densaýlyq saqtaý mınıstriAjar Ǵınııat Ýkraınadan dári ákelý kelisimsharttarynyń kúshi joıylatynyn málim etti.