Qazaqstandaǵy jýrnalıstıka fakýltetteriniń oqý baǵdarlamasyn túbegeıli jańartý kerek – Mınıstr

<p>ASTANA. KAZINFORM &ndash; Mádenıet jáne aqparat mınıstri Aıda Balaeva eldegi jýrnalıstıka fakýltetteriniń oqý baǵdarlamasy týraly pikirin bildirdi.</p>

«Mınıstrlik 2024 jyly salalyq jýrnalıstıkany damytý jónindegi jol kartasy sheńberinde respýblıka boıynsha 14 joǵarǵy oqý orny bazasynda kýrstar ótkizedi. Sonymen qatar jalpy elimizdegi 30 jýrnalıstıka fakýltetiniń oqý baǵdarlamasyn túbegeıli jańartý kerek dep esepteımiz», - dedi mınıstr Qazmedıa ortalyǵynda mınıstrliktiń alqa otyrysynda.

Onyń aıtýynsha, BAQ salasynda qabyldanǵan mańyzdy qujattar men mınıstrliktiń jumys jospary boıynsha, kontent sapasy men mazmunyn jaqsartý jumystary jalǵasady.

Soǵan baılanysty mınıstrlik jýrnalısterdiń kásibı biliktiligin arttyrý boıynsha semınar-trennıngter, oqytý kýrstaryn ótkizedi.

«Jospar aıasynda elimizdiń barlyq óńirlerin qamtyp, jýrnalıster úshin qazaq jáne orys tilderinde 40-qa jýyq oqytý is-sharalary ótkiziledi. Sonyń ishinde faktchekıng, medıaetıka, kıberqaýipsizdik jáne basqa da ózekti taqyryptar boıynsha kýrstar ótedi», - dedi A. Balaeva.