Qazaqstandaǵy qysqy demalys oryndarynda qyzmet kórsetý quny qansha turady
Almaty jáne Tıan-Shan taýlaryna ushý
Almaty qalasy men oblysy - tumsa tabıǵat mekeni. Munda shyńyn qar basqan taýdy tamashalap, tabıǵat aıasynda demalýǵa bolady. Almatyda qysqy týrızm ınfraqurylymy jaqsy damyǵan ári sapasyna qaraı baǵasy da árqıly. Kópshilik birden Shymbulaqqa barady. Munda taıaýda ǵana abonement baǵasy kóterildi. Eresekter úshin kúnine 17 500 teńge dep bekitilgen. Belsendi demalysty jaqsy kóretin adamdar shańǵy jáne snoýbord jolaǵynda ýaqytty tıimdi ári kóńildi ótkize alady. Al ekstremaldy jaqsy kóretin adamdar, táýekelshilder frıraıd, ıaǵnı, arnaıy daıyndalmaǵan jolaqty tańdaı alady. Qyzmettiń barlyq túrin tańdasańyz baǵasy - 30 000 teńge.
Esten ketpes qyzyqqa batqyńyz kelse Tıan-Shan taýyn kókten tamashalaýǵa bolady. Qyzmet quny - 55 000 teńge. Qalanyń kúıbeń tirliginen sharshaǵandar ormannyń tynyshtyǵyna shomylyp, atpen serýendeı alady. Qyzmet quny saǵatyna 6000 teńgeden bastalyp, 10 000 teńgege deıin barady.
Bir adamǵa arnalǵan nómir baǵasy 16000 teńgeden bastalady. Al lıýks quny 240 000 teńgege jetedi.
ShQO-daǵy taý shańǵysy trassasy
Shyǵys Qazaqstan oblysy - belsendi demalys pen táýekeldi súıetin jandar úshin taptyrmas oryn. Munda taý shańǵysy trassasy bar. Snoýbord-park jáne snoýkaıtıng tańdaǵan adam qyzyqqa keneledi. Buryn bul sport túrine qyzyqpaǵan jandarǵa nusqaýshylar kómektesedi. Bir kúndik abonement baǵasy 6000 teńgeden bastalyp 15 000 teńgege deıin jetedi. Demalys ornynda otbasymen birge ýaqyt ótkizetin adamdarǵa da qyzyq tabylady. Shana, tıýbıng baǵasy 3 myń teńgeden bastalady. Aspaly jolmen júrip ótý baǵasy 1000 teńgeden bastalyp 4000 teńgege jetedi. Al bir kúndik abonement baǵasy 11 000 teńgeden bastalyp 24 000 teńgege deıin barady. Ol kezde qysqy sport túriniń kez kelgenin esh kedergisiz tańdaýǵa bolady. Týrıster úshin qonaqúı de bar. Onda standart nómirler baǵasy - 18 000 - 30 000 teńge aralyǵynda. Nemese 90 myń teńge tólep, tórt adamdyq nómiri bar úıdi tańdaýǵa bolady. Úı kól jaǵasynda ornalasqan.
Shańǵydan haskıge deıin: Aqmola oblysyndaǵy qysqy demalys
Aqmola oblysynda jazǵa qaraǵanda qysqy demalys áldeqaıda qoljetimdi. Baǵa neshe kún demalatynyńyzǵa jáne qanshalyqty jaıly oryn tańdaıtynyńyzǵa baılanysty bolady. Shýche-Býrabaıda taý shańǵysy men snoýbord jáne Zerendi kýrorttyq aımaǵynda birneshe taý shańǵysy trassasy bar demalys ornyn tańdaýǵa bolady. Bir saǵattyq demalys 7000 teńgeden bastalyp, 13000 teńgege jetedi. Balalar úshin jeńildik qarastyrylǵan. Olarǵa saǵatyna - 3500-6500 teńge. Ekstrımaldy sport túrin tańdaǵandar kvadrotsıkl jáne qarda júretin kólikpen serýendeýge arnalǵan týrmarshrýt usynylady. Otbasylyq demalysty qalaǵan adamdar shanamen syrǵanap, haskı ıtterimen qydyra alady. Baǵasy 5000 teńgeden bastalady. Al ózge demalys túrin tańdaǵandar shańǵymen serýenge shyǵyp, skandınav júrisi bar marshrýtty tańdaıdy. Qyzmet quny 6 myń teńgeden bastalady.
Konkı tebýdi qalaıtyndar úshin ashyq muz aıdyndary jumys istep tur. Kól betinde hokkeı oınaýǵa bolady. Al tájirıbeli snoýbordshylar men shańǵyshylar úshin frıraıd marshrýty bar. Mundaǵy barlyq qyzmet túri 33 000 teńge shamasynda.
Standart nómirleriniń baǵasy shamamen 24 000 teńge bolyp tur. Al VIP vıllalar baǵasy táýligine 430 myń teńge.
SQO-daǵy tańǵajaıyp tabıǵat
Imantaý-Shalqar kýrorttyq aımaǵyndaǵy tabıǵı landshaftty qazaq jerindegi Shveıtsarııa dep ataıdy. Týrıster Soltústik Qazaqstandaǵy tabıǵat tańǵajaıybyn jyl boıy tamashalap, tynyǵady. Degenmen qysqy keremettiń orny erek. Bul jerde belsendi demalys pen saýyqtyrýǵa baǵyttalǵan 10 týrıstik nysan bar. Kelýshilerge kvadrotsıkl, shańǵy, konkı usynylady. Ekstrımaldy jaqsy kóretin adamdar shanamen jáne snoýbordta syrǵanaıdy. Baǵasy 15 000 teńgeden bastalady. Sonymen birge Shalqar men Imantaýda balyq aýlaıdy. Baǵasy 6500 teńgeden bastalady. Densaýlyǵyn shyńdaǵysy keletin adamdar muzdaı sýǵa shomylady. Qysta sýda júzýge bar jaǵdaı jasalǵan. Baǵasy 7 myń teńgeden bastalady. Demalys ornynda bir kún túneý orta eseppen - 15 000 teńge.
Túrkistan oblysyndaǵy tabıǵat
Tóle bı aýdanyndaǵy taý shańǵysy bazasyna Shymkentten bir saǵatta jetýge bolady. Munda qar az bolǵan kúnniń ózinde zamanaýı tehnologııanyń kómegimen syrǵanaýǵa bar jaǵdaı jasalǵan. Taýda 152 adamǵa qyzmet kórsete alatyn aspaly jol bar. Bir ret kóterilý quny balalarǵa 2500 teńge, eresekterge 5000 teńge.
Demalys ornynda frıraıdty tańdaıtyndar úshin birneshe trassa qarastyrylǵan. Sonymen birge daıyn jolaqty tańdaıtyn adamdarǵa arnaıy marshrýt usynylady. Baǵasy 3000-10 000 teńge aralyǵynda.
Standart nómirlerde turý baǵasy 30 000 teńge. Al bir top adamǵa, onyń ishinde 10 janǵa baǵasy 270 000 teńge bolatyn kottedj usynylady.
Jabdyqtarǵa qosymsha aqy tóleıdi
Qazaqstannyń taý-shańǵy kýrorttaryna barý úshin qosymsha aqsha kerek ekenin umytpaǵan jón. Munda kıim men túrli kerek-jaraqty aldyn ala jalǵa alý kerek.
Shańǵy men snoýbordty bir kúnge jalǵa alý baǵasy 5000-10000 teńge.
Snoýbordqa arnalǵan kıim jáne kerek jaraq quny 6000-13000 teńge aralyǵynda. Shlem men túrli qajetti qorǵanys zattary 1000-3000 teńge aralyǵynda.
Nusqaýshy qyzmeti:
Shańǵy men snoýbord tebýdi úıretetin jeke nusqaýshy qyzmeti saǵatyna 7000-15000 teńge turady.
Toptyq dáris baǵasy saǵatyna 4000-6000 teńge.
Buǵan deıin biz Jańa jyl atrıbýty shyrshanyń baǵasyn bildik.
Sonymen birge suranysqa ıe mandarınniń kelisin salystyrdyq.