Qazaqstandaǵy eń uzyn 5 kanal

<p>ASTANA. KAZINFORM — Sý resýrstary jáne ırrıgatsııa mınıstrligi elimizdegi eń uzyn 5 kanalǵa sholý jasady. </p>

JAŃADARIıA KANALY

Jańadarııa kanaly — Syrdarııa ózeniniń sol jaǵalaýynda ornalasqan. 

Qyzylorda oblysynyń egistik jerlerin, kókónis-baqsha daqyldaryn, sondaı-aq tabıǵı jaıylymdar men jemshóp alqaptaryn sýarýǵa arnalǵan. 

Kanaldyń jalpy uzyndyǵy — 555,4 shaqyrym, onyń 535,6 shaqyrymy tabıǵı sý arnasy arqyly ótedi.

ERTІS-QARAǴANDY KANALY

Ertis — Qaraǵandy — Ortalyq Qazaqstannyń ónerkásiptik aýdandary men aýyl sharýashylyǵyn sýmen qamtamasyz etýge arnalǵan kanal. 

Uzyndyǵy — 458 shaqyrym. Onyń 272 shaqyrymy Pavlodar oblysy arqyly, 186 shaqyrymy Qaraǵandy oblysynyń aýmaǵynan ótedi.

Ertis ózeniniń salasynan, Aqsý qalasynan joǵary ornalasqan Belaıa ózeninen bastaý alady.

Kanaldyń negizgi qurylystary: 22 sorǵy stantsııasy, olardyń kómegimen sý 418 metrge, 14 sý qoımasy men 34 kanalǵa kóteriledi. 

Bir sorǵy stantsııasy sekýndyna 18 tekshe metr nemese táýligine 1,5 mln tekshe metr sý ótkize alady.

ARYS-TÚRKІSTAN KANALY

Arys — Túrkistan — Túrkistan oblysynyń aýmaǵyndaǵy sýarý kanaly. Jalpy uzyndyǵy — shamamen 196 shaqyrym. 

Qaraspan sý qoımasynan Bógen sý qoımasyna deıingi Arys kanalynyń uzyndyǵy — 51 shaqyrym. 

Bógen sý qoımasynan bastalatyn Túrkistan kanalynyń uzyndyǵy shamamen 145 shaqyrym.

ÚLKEN ALMATY KANALY

D.Qonaev atyndaǵy Úlken Almaty kanaly Іle ózeniniń basseıninde ornalasqan.

Kanal sýy egis alqabyn sýarý, iri ónerkásiptik, shaǵyn sharýashylyq jáne rekreatsııalyq qajettilikter úshin paıdalanylady.

Gıdrotehnıkalyq nysandy salý ıdeıasy Dinmuhamed Qonaevqa tıesili. 

Qazaqstan kompartııasy ortalyq komıtetiniń birinshi hatshysy jobaǵa rekordtyq 270 mln rýbl bólý týraly sheshimge qol jetkizedi.

Jalpy uzyndyǵy — 168 shaqyrym. Kanal Almaty oblysynyń Eńbekshiqazaq, Talǵar, Qarasaı aýdandary arqyly ótip, Almaty qalasyna jetedi.

QYZYLQUM KANALY

Qyzylqum kanaly — Túrkistan oblysyndaǵy ırrıgatsııalyq kanal. Jalpy uzyndyǵy — 116,3 shaqyrym.

Syrdarııa ózenindegi Shardara sý qoımasynan bastaý alady jáne oblystyń soltústik aımaǵyna sý jetkizedi.

Kanal 74,3 myń gektardan astam egis alqabyn sýarýǵa, sondaı-aq Shardara sý qoımasynyń tolyp ketý qaýpi tóngen kezde tasqyn sýyn ótkizý úshin paıdalanylady.