ShQO-da ájelerge eskertkish ornatylady
Óskemen qalasynda ájelerdiń qatysýymen oblystyq forým ótti. Buǵan deıin óńirde ardagerler alqasynyń janynan «Ájeler alqasy» keńesi qurylǵan bolatyn. óz kezeginde Shyǵys Qazaqstan oblysynyń ákimi Ermek Kósherbaev ájelerdiń otbasy ınstıtýtyn nyǵaıtýǵa qosatyn úlesin aıryqsha atap ótip, olardy baǵalaý kerek ekenin jetkizdi.
«Biz ákesin qurmettegen, anasyn ardaqtaǵan halyqpyz. Sondyqtan búgingi is-sharanyń máni men maǵynasy zor. Memleket basshysy Qasym-Jomart Toqaev «Halyqtyń bereke-birligin saqtaý eldigimiz úshin asa mańyzdy. Bul iste zııaly qaýym aıryqsha ról atqarady. Aǵa býyn jas urpaqqa jol nusqap, baǵyt-baǵdar berýi kerek» dep atap ótken bolatyn. Búkil sanaly ǵumyryn el ıgiligine, urpaq tárbıesine jumsaǵan aǵa býynǵa biz árqashan qaryzdarmyz. Quramynda 120 myńnan astam qarııasy bar oblystyq ardagerler keńesi janynan «Ájeler alqasy» quryldy. Asyl ájelerimiz salıqaly urpaq tárbıelep, otbasylyq qundylyqtardy nyǵaıtyp, salt-dástúrdi nasıhattap júr. Ájeler alqasy oblystyń ár qalasy men aýdanynda jumys isteıtin bolady. Aq jaýlyqty analarymyzdyń bastamalaryn tolyǵymen qoldaımyz. Urpaqtar sabaqtastyǵyn jalǵastyrý jolynda jastarmen júıeli jumys júrgizý óte mańyzdy. Uly Abaı atap ótken «Paıda emes, ardy oılaıtyn» urpaq tárbıeleýde asyl analarymyzdyń orny erekshe. Barlyq ana men ájege qurmet kórsete otyryp, biz Óskemende «Áje» monýmentaldy eskertkishin ornatamyz», - dedi aımaq basshysy.
Ermek Kósherbaev atadan balaǵa mıras bolyp qalǵan ulttyq qundylyqtarymyzdy dáripteıtin ardagerler keńesiniń janynan óskeleń urpaqty ulttyq qolónerdiń dástúrli túrine baýlıtyn bólimder ashýdy usyndy.
«Bala tárbıesindegi qazaqtyń ozyq úlgisi – ata-áje tárbıesi edi. Osyny eskere otyryp, aqsaqaldar men ájeler ulttyq kólóner sheberliginiń qyr-syryn jastarǵa úıretetin, umyt qalǵan ıgi dástúrdi jańǵyrtatyn bólim nemese ortalyq qurýymyz kerek. Aǵa býynnyń óneri, mektebi, ónegesi – búgingi qoǵamǵa kerek baǵa jetpes baılyq, boıǵa tereń sińiretin taptyrmas tárbıe quraly», - dedi Shyǵys Qazaqstan oblysynyń ákimi.
Forým barysynda oblystyń qoǵamdyq ómirine úles qosqan aǵa býyn ókilderine «ShQO qurmetti ardageri» tósbelgisi tabystalyp, olar Alǵys hattarmen marapattaldy.
«Forýmǵa shaqyrtý túsken soń oılanbastan kelisimimdi berdim. Sebebi osyndaı is-sharalar asa qajet. Urpaq tárbıesi otbasynan bastalady. «Qarty bar úıdiń – qazynasy bar» deıdi. Sol qazynany ózimizben birge alyp ketpeı, jas býynmen bólisýimiz qajet. Biz kitaphanaǵa, mektepterge, ýnıversıtetterge, qarttar úıine baryp túrli is-sharalarǵa qatysyp kelemiz. Qaıyrymdylyqqa da atsalysyp, muqtaj jandarǵa qolymyzdan kelgenshe kómektesýge tyrysamyz. Eń bastysy – meıirimdilik. Bir-birimizge meıirimdi bolyp, qýanysh syılap júreıik», - dedi 12 nemere, 3 shóbere súıip otyrǵan áje Raısa Jakýbaeva.