Qazaqstanda jylytý maýsymyna daıyndyq qalaı
«Kommýnaldyq-turmystyq sektor men halyq úshin negizgi kómir óndirýshiler – Shubarkól men Qarajyra bolyp otyr. Bıylǵy 7 aıda halyqqa jáne bıýdjettik uıymdarǵa 4,5 mln tonna kómir tıelgen, bul ótken jylǵy kezeńnen 10%-ǵa kóbirek. Ótken jyly aýa raıynyń erte salqyndaýynan keı óńirlerde kómir satyp alýǵa úlken kezek bolǵany belgili, bul halyqtyń dúrligýine sebep boldy. Bıyl oǵan jol bermeý kerek», - dedi Іlııas Ospanov Ortalyq kommýnıkatsııalar qyzmetinde ótken baspasóz máslıhatynda.
Spıkerdiń aıtýynsha, óńirler, sonyń ishinde turǵyndardyń ózi kómir qoryn ýaqytyly satyp almaǵany anyqtaldy. Ekinshi sebep – suranystyń shamadan tys kóbeıip, júktemeniń artýy.
«Kelesi jylytý kezeńine (2022-2023 jyldar) halyqty kómirmen aldyn ala qamtamasyz etýge daıyndyq bıylǵy naýryz aıynda, ótken jylytý maýsymynan keıin bastaldy. Barlyq turǵyndardy sýyq túskenshe kómir qoryn satyp alýǵa keńes beremin», - dedi Іlııas Ospanov.
Mınıstrlik aldaǵy jylytý kezeńine bıýdjettik uıymdar men turǵyndar úshin kómir qajettiligi josparyn qurǵan.
«Osy josparǵa sáıkes shamamen 9,6 mln tonna kómir tutynylady, onyń ishinde kommýnaldyq-turmystyq sektorǵa – 2,6 mln tonna, turǵyndarǵa – 7 mln tonna kómir qarastyrylǵan. Turǵyndardan basqa, bıýdjettik uıymdar men strategııalyq nysandar da sol kómirdi paıdalanatynyn eskerý qajet», - dedi komıtet tóraǵasy.
Foto: QR Indýstrııa jáne ınfraqurylymdyq damý mınıstrligi