Qazaqstanda jylyna 20 mln adam temir jol qyzmetin paıdalanady
Dostastyqqa qatysýshy elderdiń Temirjol kóligi Keńesiniń Dırektsııasy uıymdastyrǵan sharada, forým qatysýshylary aldynda, «QTJ» UK» AQ Damý jónindegi vıtse-prezıdenti Arman Sultanov sóz sóıledi.
«Bıylǵy jyly kompanııanyń qurylǵanyna 20 jyl toldy. Búginde «QTJ» UK» AQ barlyq kólik túrleriniń ınfraqurylymy men qyzmet túrlerin shoǵyrlandyrǵan ulttyq kólik operatory bolyp tabylady», - dep atap ótti A. Sultanov. Sonymen qatar temirjol salasyndaǵy jáne jolaýshylar tasymaldaýdaǵy serpindi jańǵyrýlar týraly baıandady.
Onyń aıtýynsha, «Nurly jol» memlekettik baǵdarlamasy sáýlelik tártippen jáne elimizdiń óńirlerin yqpaldastyrý arqyly júzege asyrylýda. Kompanııada júrdek jolaýshylar qozǵalysyn damytý Baǵdarlamasy atqarylýda.
Qazirgi tańda Qazaqstannyń barlyq iri qalalary qazaqstandyq óndiristen shyqqan «Tulpar-Talgo» jolaýshylar vagondarynan jasaqtalǵan 15 júrdek jolaýshylar baǵdary jelisimen qamtylǵan. Ol arqyly poıyzdardyń baǵdardaǵy jol júrý merzimi 1,5-2 esege deıin qysqardy.
2016 jyldan bastap «Tulpar-Talgo» óndirisinde jańa da jaıly, keń qorapty vagondarymen almastyrý bastaldy. 2022 jyldarǵa deıin 21 jyljymaly quramdy almastyrý josparlanyp otyr.
«Tsıfrly temirjol» jobasy aıasynda jolaýshylar tasymaldaý qyzmetin sandyq júıege kóshirý boıynsha aýqymdy jumystar atqarylýda. Halyqaralyq EKSPO- 2017 kórmesiniń ashylýy qarsańynda zamanaýı «Nurly jol» vokzal kesheni paıdalanýǵa berildi.
Búginde ulttyq tasymaldaýshy 120 baǵdarǵa qyzmet kórsetip, jylyna 20 mıllıonnan astam jolaýshyny tasymaldaıdy. Bıylǵy jarty jylda 10 mılıonnan astam jolaýshy tasymaldandy. Bul ótken jyldyń sáıkes merzimimen salystyrǵanda, eki paıyzǵa joǵary kórsetkish. Onyń ishinde «Tulpar-Talgo» poıyzdarymen 1 mıllıon 200 myń jolaýshy tasymaldandy. Bul ótken jyldyń sáıkes merzimimen salystyrǵanda, 30 paıyzǵa joǵary kórsetkish.
Bıylǵy jyly jańadan «Almaty-Tashkent» halyqaralyq baǵdary ashyldy. Halyqaralyq «EKSPO-2017» kórmesi aıasynda 14 baǵdarǵa qosymsha poıyzdardyń baǵdary, onyń ishinde eki baǵdarǵa «Samarqan - Astana-Nurly jol» jáne «Dýshanbe - Astana-Nurly jol» halyqaralyq poıyzdary jiberildi.
Jolaýshylarǵa barynsha qolaıly bolý úshin elektrondy bılet alýdyń 10 ınternet portaly, mobıldik usynymdar qyzmet kórsetedi. Osylaısha, elektrondyq sandyq formadaǵy bıletterdiń 80-90% ıelerin tabady. Sonymen qatar áýe kassalarymen de «Amadeýs» jelisi arqyly elektrondyq bıletter satylady.
Ulttyq tasymaldaýshy jolaýshylar tasymaldaýdy damytý jáne qyzmet sapasyn kóterý jáne jolaýshylarǵa jaıly bolýy úshin barlyq sharalardy qoldanýda.
«QTJ» UK» AQ basshysy «halyqaralyq baǵdarlardyń tıimdiligin kóterý, tarıftiń básekelestikke sáıkestigin damytý, jolaýshylar tasymaldaýdy uıymdastyrýǵa jańa tehnologııalardy tartý úshin birlesken strategııalyq damý josparyn túzýdiń qajettigin» atap ótti. Osy jolaýshylar aǵynyn tartý maqsatyndaǵy sońǵy úlgidegi qadamdardy anyqtap, birlesken jobalardy talqylaýdyń nátıjesi jemisti bolatyndyǵyna senim bildirdi.
Forým qatysýshylary halyqaralyq baǵdardaǵy jolaýshylar tasymaldaýdy ári qaraı damytýdaǵy qyzmet sapasy men tıimdiligin kóterý, vagondardyń jaılylyǵyn jaqsartý, jolaýshylarǵa qyzmet kórsetý salasyna jańa tehnologııalardy engizý, jolaýshylar tasymaldaý naryǵyn memlekettik retteý barysy týraly mańyzdy máselelerdi talqylady.
Forýmda Dostastyqqa qatysýshy elderdiń Temirjol kóligi Keńesi Dırektsııasynyń tóraǵasy P. Kýcherenko, «Jolaýshylar tasymaly» AQ prezıdenti N. Qılybaı, «RTJ» AAQ jolaýshylar tasymaldaý jónindegi dırektory D. Pegov, «Federaldyq jolaýshylar tasymaldaý kompanııasy» AAQ bas dırektory P. Ivanov, Belorýs temir jolynyń jolaýshylar qyzmet kórsetý basqarmasynyń bastyǵy A. Zaharevıch, «Lıtva temir joldary» AQ dırektorynyń orynbasary E. Lazeýskas baıandama jasady.
Halyqaralyq jolaýshylar forýmynyń qatysýshylary halyqaralyq EKSPO-2017 kórmesin aralady. «Tulpar-Talgo» jolaýshylar vagondaryn shyǵaratyn kásipornynda bolyp, «Nurly jol» zamanaýı temirjol vokzalyn tamashalady.