Qazaqstanda jylýmen jabdyqtaý júıesi qanshalyqty jaqsardy
«Nesıeleý men sýbsıdııalaý tetikteri arqyly 2015-2017 jyldary 332 jobany júzege asyrýǵa 203 mlrd teńge baǵyttaldy. Bul jobalar 3 208 shaqyrym jylý jáne sýmen qamtamasyz etý, sý burý jelileriniń qurylysyna, 34 qazandyq pen 16 sý sharýashylyǵy nysandaryna qarastyrylǵan. Jalpy, 2015-2017 jyldary memlekettik baǵdarlamany júzege asyrý kezeńinde 1 848 shaqyrym jylý jáne sýmen jabdyqtaý, sý burý jelileri, 21 qazandyq men 12 nasostyq stansa qurylys jumystarymen qamtyldy. Membaǵdarlama aıasynda 2015 jyly bıýdjettik nesıeleý tetikterimen 92 jobany iske asyrýǵa 60 mlrd teńge bólindi. Nátıjesinde, 250 shaqyrymǵa jýyq ınjenerlik jeliler salyndy jáne qaıta jasaldy. Ótken jyly 1 733 shaqyrym jeliniń qurylysyna eseptelgen 86 mlrd 900 mln teńge somasynda 112 joba iriktelindi. Búginde tabıǵı monopolııa sýbektilerimen qarjy ıgerý kólemi 75,5 mlrd teńge nemese bólingen qarajattyń 87 paıyzyn qurady. Qalǵan 11,5 mlrd teńge bıyldyń sońyna deıin ıgeriledi», - dedi vıtse-mınıstr Parlament Májilisindegi «Nur Otan» partııasynyń fraktsııasy janyndaǵy ınfraqurylymdy damytýdyń 2015-2019 jyldarǵa arnalǵan «Nurly jol» baǵdarlamasyn iske asyrýǵa Ulttyq qorynan bólinetin qarajattyń jáne bıýdjet qarjysynyń maqsatty ári tıimdi jumsalýyna baqylaý júrgizý boıynsha komıssııanyń otyrysynda.
Onyń sózine qaraǵanda, 2017 jyly bólingen 48 mlrd teńgege 103 ınvestıtsııalyq joba iriktelinip aldy, osy oraıda 1 200 shaqyrymǵa tarta jelilerdiń qurylysy men qaıta qalpyna keltirý sharalary josparlanyp otyr. Qarastyrylǵan qarjy eki jyldyq nesıeleý tetigine sáıkes, 2018 jyldyń sońyna deıin ıgeriledi.
Sklıardyń atap ótýinshe, 2016 jyldan beri Petropavl, Pavlodar, Shymkent qalalarynda 14 mlrd teńgeniń 18 jobasy iske asyrylyp jatyr. Sonymen qatar halyqaralyq qarjy uıymdarymen seriktestik týraly negizgi kelisimderdi júzege asyrý boıynsha Úılestirý keńesimen jalpy somasy 40,6 mlrd teńgege taǵy 10 joba maquldandy. Atalǵan tetik kommýnaldyq kásiporyndardyń jarǵylyqty kapıtalyn tolyqtyrý arqyly teń qarjylandyrýdy qarastyrady. Al Aqtóbe, Shyǵys Qazaqstan, Jambyl, Qostanaı, Qyzylorda, Soltústik Qazaqstan oblystarynda respýblıkalyq bıýdjetten jobalardy iske asyrýǵa 14 mlrd 200 mln teńge bólinýde.
«Atalǵan sharalardy júzege asyrý nátıjesinde jylý jáne sýmen jabdyqtaý jelileriniń tozýy deńgeıi 2016 jyldyń qorytyndysy boıynsha 67 paıyzdan 63 paıyzǵa deıin qysqardy. 2020 jylǵa qaraı bul kórsetkishti 53 paıyzǵa deıin jetkizý josparlanyp otyr», - dedi vıtse-mınıstr.