Qazaqstanda jylý energııasyna tarıf óse me

NUR-SULTAN. QazAqparat – QR Básekelestikti qorǵaý jáne damytý agenttigi tóraǵasynyń birinshi orynbasary Rýstam Ahmetov Qazaqstanda jylý energııasyna tarıfterdiń ósýi múmkindigine qatysty suraqqa jaýap berdi, dep habarlaıdy QazAqparat tilshisi.

«Jylý energetıkasy tabıǵı monopolııa salasy bolyp sanalady, básekelestik naryǵy emes. Bul turǵyda bizde tarıftik retteý bar. Zańnamada tarıftik retteýdiń negizgi maqsaty eskerilgen, ıaǵnı tutynýshy men jylý energııasy óndirýshileri múddeleri arasyndaǵy teńgerimdi aıqyndaý qarastyrylǵan», - dedi Rýstam Ahmetov Ortalyq kommýnıkatsııalar qyzmetinde.

Onyń aıtýynsha, elimizde tarıfti qalyptastyrýdaǵy qadamdar shyǵyn tetigi boıynsha júrgiziledi, ıaǵnı tarıf tabıǵı monopolııalar sýbektileri kórsetetin shyǵynnyń negizinde qalyptasady. Osy oraıda ol bul qadamdy yntalandyrýshy tarıfti qalyptastyrýǵa aýystyrý usynysy jasalǵanyn eske saldy.

Sonymen qatar agenttik ókiline tilshiler jylý energııasynyń qymbattaýy múmkindigine qatysty suraq qoıdy.

«Jalpy, bizde baǵa retteletin naryqtarda ǵana emes, sonymen qatar básekelestik naryqtarda da kóterilip jatyr. Barlyq jerde shıkizatqa, elektr energııasyna, energııa resýrstaryna shyǵyndardyń artýyna baılanysty osy protsesti baıqaýǵa bolady. Sondyqtan bul protsess tarıftiń ósýine qaraı jyljyp keledi. Alaıda shyǵyndy tásildi saqtaý nemese yntalandyrýshy ádistemeni engizý tikeleı tarıftiń ósýine yqpal etpeıdi. Bul turǵyda osy naryqtarda tarıfti qalyptastyrý tetikterine qatysty bolyp tur», - dedi Rýstam Ahmetov.