Qazaqstanda jylqy sany kóbeıdi

NUR-SULTAN. QazAqparat - 2020 jyldyń 7 aıynyń qorytyndysynda aýyl sharýashylyǵy óniminiń kólemi 1,7 trln teńgeni qurady. Bul týraly Úkimet otyrysynda QR Aýyl sharýashylyǵy mınıstri Saparhan Omarov aıtty, dep habarlaıdy QazAqparat tilshisi.

«Osy jyldyń 7 aıynyń qorytyndysy boıynsha jalpy aýyl sharýashylyǵy óniminiń kólemi 2,5 paıyzǵa ulǵaıyp, 1,7 trln teńgeni qurady. Bul ósim negizinen mal sharýashylyǵynda óndiris kóleminiń 2,6, onyń ishinde tiri salmaqta ettiń 3,6, súttiń 3 paıyzǵa ulǵaıýy esebinen qamtamasyz etildi», - dedi ol.

Mınıstrdiń aıtýynsha, oblystar bólisinde respýblıkalyq deńgeıden joǵary qarqyn Batys Qazaqstan, Aqtóbe, Qaraǵandy, Soltústik Qazaqstan jáne Aqmola oblystarynda baıqalyp otyr.

«6 aıdyń qorytyndysynda iri qara mal sany 4,5, qoı sany 2,5, jylqy sany 8,5, túıe sany 4, shoshqa sany 0,7 paıyzǵa ósti», - dedi Saparhan Omarov.