Qazaqstanda jyl saıyn 6 mıllıon sharshy metr turǵyn úı paıdalanýǵa beriletin bolady-N. Nazarbaev
Elbasy atalǵan baǵdarlamaǵa sáıkes, qurylys salasyna memlekettik qoldaý kórsetýdiń birneshe negizgi sharalary qarastyrylǵanyn atap kórsetti. Birinshi shara - jergilikti atqarýshy organdardan turǵyn úı qurylysy úshin turǵynúıqurylysjınaq júıesin paıdalana otyryp, qosymsha qarajat bólý. "Baǵdarlamanyń júzege asyrý kezeńi barysynda bul baǵyt boıynsha shamamen barlyǵy 796 myń sharshy metr turǵyn úı salynady. Osy maqsatta Úkimet 127 mıllıard teńge mólsherinde qarajat bóledi", - dedi Prezıdent.
Memleket basshysynyń aıtýynsha, kelesi shara kommertsııalyq turǵyn úı qurylysyn qarjylandyrý úshin ekinshi deńgeıli bankterdi qarjylandyrý. Bul baǵyt boıynsha 70 mıllıard teńge kóleminde qarjylandyrý kózdelgen jáne jyl saıyn jalpy aýmaǵy 2,4 mıllıon sharshy metr turǵyn úı salý josparlanýda.
Prezıdent toqtalyp ótken úshinshi shara - turǵyn aýdandarynyń ınjenerlik kommýnıkatsııasy qurylysy úshin memlekettik bıýdjetten qosymsha qarjy bólý. Bul baǵyt boıynsha 134 mıllıard teńge bólindi jáne jyl saıyn 3 mıllıon sharshy metr turǵyn úıdi paıdalanýǵa berý josparlanýda. Osy tetik aıasynda seriktes qalalar Astana men Almatynyń ınjenerlik ınfraqurylymyn damytý qarastyrylǵan. Bul memlekettik jáne kommertsııalyq turǵyn úılerdiń ýaqtyly berilýine múmkindik jasaıdy.
Tórtinshi shara - jalǵa beriletin memlekettik turǵyn úı qurylysy. Baǵdarlama sheńberinde jalǵa beriletin memlekettik turǵyn úı qurylysy jalǵasady. Bul maqsat úshin 40 mıllıard teńge qarastyrylǵan jáne 680 myń sharshy metr turǵyn úı salý kózdelgen.
«Osy sharalardyń barlyǵy turǵyn úı baǵasynyń josyqsyz ósýine, alypsatarlyq pen kezekti «kópirshiktiń» paıda bolýyna jol bermeýge baǵyttalǵan jáne jyl saıyn 6 mıllıon sharshy metr turǵyn úıdi paıdalanýǵa berýge múmkindik týǵyzady», - dedi Memleket basshysy.