Qazaqstanda jyl saıyn 400 myńnan astam náreste dúnıege keledi
«Balalardyń densaýlyǵyn saqtaý jáne nyǵaıtý mańyzdy baǵyttardyń biri sanalady. Búginde elimizde 6,6 mıllıonnan astam bala turady. Sońǵy 5 jylda balalar sany 800 myńǵa kóbeıdi. Jyl saıyn elde 400 myńnan astam bala dúnıege keledi. Bul – óte jaqsy demografııalyq kórsetkish», – dedi Maǵrıpa Embergenova Ortalyq kommýnıkatsııalar qyzmetinde ótken brıfıngide.
Onyń aıtýynsha, elimizde 5 myńnan astam densaýlyq saqtaý nysany balalarǵa ambýlatorııalyq kómek kórsetedi.
«Budan bólek, balalarǵa statsıonarlyq kómek kórsetetin 14 myńnan astam tósek-oryn ashyldy. Balalarǵa medıtsınalyq kómek kórsetý júktilik kezeńnen bastalady. Máselen, jyl saıyn elimizde 500 myń júkti áıel halyqaralyq standartqa saı barlyq skrınıng pen tekserýlerden ótedi», - dep baıandady Maǵrıpa Embergenova.
Qosa ketsek, atalǵan brıfıngige qatysqan Birikken Ulttar Uıymyna qarasty Balalar qorynyń Qazaqstandaǵy ókili Artýr Van Dızen el aýmaǵynda balalar quqyǵy jónindegi biryńǵaı ortalyq organ qurýdy usyndy.