Qazaqstanda jyl saıyn 12 myńnan astam berekesiz otbasy tirkeýde turady - Zaǵıpa Bálıeva

ASTANA. QazAqparat - Qazaqstanda jyl saıyn 12 myń berekesiz otbasy quqyq qorǵaý organdaryna esepte bolady. Bul týraly búgin Ortalyq Azııa elderiniń jabyq mekemelerindegi balalarǵa qatysty zorlyq-zombylyqty boldyrmaý sımpozıýmynda Qazaqstandaǵy bala quqyqtary jónindegi ýákil Zaǵıpa Bálıeva málim etti.

«Jyl saıyn ishki ister organdarynyń esebinde 12 myńnan astam berekesiz otbasylar bolady. Olarda 17 myńnan 18 myńǵa deıin bala ómir súrýde. Olar is júzinde ár kún saıyn  ózderiniń problemasy mol ata-analarynyń janynda ómir súrý úshin kúresýde», - dedi ol.

Sonymen qatar ol áýmeser minez-qulyqty balar sanynyń tómendemeı otyrǵandyǵyna jáne olardyń kishkentaı kezderinen ıývenaldy polıtsııa esebinde turatyndyǵyna alańdaýshylyq tanytty.

«Jyl saıyn olardyń sany 10 myń balany quraıdy. Aǵymdaǵy jyldyń birinshi jartyjyldyǵynda kámelettik jasqa tolmaǵandar 1549 quqyq buzýshylyq jasady. Bul qaıta tómendegeni. Máselen, 2015 jyldyń sáıkes kezeńinde 2239 buzýshylyq jasalǵan edi. Buǵan qosa, 179 jasóspirim qylmys jasaǵany úshin sottaldy. 2015 jyly 202 jasóspirim isti bolǵan edi. 53 kámelettik jasqa tolmaǵan bala tárbıeleý kollonııalarynda otyr. Ótken jyly bul kórsetkish 67 bala bolǵan», - dedi Z.Bálıeva.