Qazaqstanda jyl saıyn 100 myń páter salynady - Jaıymbetov

ASTANA. QazAqparat - Qazaqstanda jyl saıyn 100 myń páter salynatyn bolady. Bul týraly búgin Ortalyq kommýnıkatsııalar qyzmetindegi brıfıngte QR Ulttyq ekonomıka mınıstrligi Qurylys, turǵyn úı-kommýnaldyq sharýashylyq isteri jáne jer resýrstaryn basqarý komıtetiniń tóraǵasy Marhabat Jaıymbetov málim etti, dep habarlaıdy QazAqparat.

Komıtet basshysy Úkimette «Nurly jer» baǵdarlamasy aıasynda jylyna qansha turǵyn úı paıdalanýǵa beriletindigi jaıynda esep bar bolǵanymen atalǵan qujat áli bekitilmegendikten naqty derekterdi jarııa ete almaıtyndyǵyn aıtty.

«Biraq, shamamen jylyna 100 myń, 15 jylda 1,5 mln. páter salynatyn bolady. Máselen, ótken jyly búkil el boıynsha 78 myń páter salynǵan edi. Bul shamamen 9 mln. sharshy metr turǵyn úıdi quraıdy. Ol jylyna shamamen 5,6 paıyzǵa ósip otyrady. Biz ósimdi osy shekte boljap otyrmyz. Jalpy, naqty esepteri bar. Degenmen, baǵdarlama áli tolyq qabyldanbaǵandyqtan, ony jarııa etpeı-aq qoıaıyn», - dedi komıtet basshysy.

Sonymen qatar ol elimiz boıynsha 18 turǵyn úı kombınaty salynǵanyn atap ótti.

«Olar memleket tarapynan qoldaýǵa ıe bolyp otyr. Shynymen de turǵyn úı kombınattary materıaldarynan salynatyn úılerdiń qurylysy jedel ári arzan bolady. Bizdiń esepteýimizshe, 20-30 paıyzǵa arzan. Al jedeldigine keler bolsaq, máselen, 5 qabatty úı 6-9 aı salynsa, turǵyn úı kombınaty materıaldaryn paıdalanyp, 3,4 aıda úı turǵyzýǵa bolady», - dedi Jaıymbetov.