Qazaqstanda jyl basynan beri 82,5 mln tonna munaı óndirildi
«2019 jylǵy qańtar-qarashada óndiris kólemi 82,5 mln tonnaǵa jetip, jospardan asyra óndirilip (101,8%) jatyr. 2019 jyldyń sońyna deıin munaı óndirý josparyn birshama asyra oryndap, kólemin 90,5 mln tonnaǵa jetkizý kózdelýde», - dedi Energetıka vıtse-mınıstri Áset Maǵaýov Úkimettiń baspasóz ortalyǵyndaǵy brıfıng barysynda.
Onyń aıtýynsha, 90,5 mln tonna munaıdyń 17 mln tonnasy Qazaqstanda qalady da, qalǵany eksportqa shyǵarylady. Bul rette 2019 jyly 3 iri jobada jóndeý jumystary júrgizilgen. Kúrdeli jóndeý aıaqtalǵannan keıin Qashaǵan ken ornynda munaı óndirý kólemi táýligine 370 myń barrelge jetken.
«Teńiz ken oryndaryn keleshekte keńeıtý jáne Qashaǵan ken ornynda gazdy keri aıdaý qýatyn arttyrý jobalary esebinen 2023 jyldan bastap óndiris kólemin 100 mln tonnaǵa kóbeıtý boljanyp otyr. Qalǵan kompanııalar boıynsha munaı óndirisi tabıǵı azaıady degen boljam bar. Qyzylorda oblysynyń ken oryndarynda munaı óndirý tómendeıdi dep kútiledi», - dedi ol.