Qazaqstanda jyl basynan beri 25 myń júkti áıel koronavırýs juqtyrdy

NUR-SULTAN. QazAqparat – Elimizde jyl bastalǵaly 25 myń júkti áıel koronavırýs indetine shaldyqty. Bul týraly QR Densaýlyq vıtse-mınıstri Ajar Ǵınııat málim etti, dep habarlaıdy QazAqparat tilshisi.

«Men jumys babymen ınfektsııalyq aýrýhanalarǵa jıi baramyn. Árıne, onyń ishinde koronavırýsta bar. Sonda jany qınalyp jatqan adamdardy kórgende bul indettiń óte aýyr ekenin túsinesiń. Osy oraıda aıtarym, bul kezeńdik ınfektsııa emes, sondyqtan azamattardan koronavırýsqa atústi qaramaýyn suraımyn. Elimizde indet etek jaıǵan kezde júkti áıelderge arnalǵan bólimshe ashtyq. Bıyl jyl basynan beri sol bólimshelerge COVID-19 juqtyrǵan 25 myń júkti áıel tústi. Vırýs jassyń ba, kárisiń be, júktisiń be tańdamaıdy. Qaı jerde taraldy, sol jerdegi barlyq adamǵa juǵady», - dedi Ajar Ǵınııat tanymal telejúrgizýshi Láılá Sultanqyzyna bergen suhbatynda.

Eske sala ketsek, elimizde júkti áıelder men emizýli analarǵa Pfizer vaktsınasyn salý protsesi 15 qarashada bastaldy.

Osy tusta Nur-Sultan qalalyq Qoǵamdyq densaýlyq saqtaý basqarmasy elordada vaktsına alǵysy keletin júkti jáne emizýli analardyń qatary kóp ekenin habarlady.

Sondaı-aq, búgin elimizdiń Densaýlyq saqtaý mınıstri Alekseı Tsoı Pfizer vaktsınasyn alyp jatqan júkti áıelder, emizýli analar men jasóspirimderdiń jaǵdaıy týraly aıtyp bergen edi.