Qazaqstanda jyl basynan beri 18 ret poıyz ben avtokólik soqtyǵysqan

ASTANA. QazAqparat - Jyl basynan beri poıyzdyń avtokólikpen soqtyǵysqan 18 oqıǵasy tirkeldi. 10 aı ishinde poıyz mashınısteri 3000-nan astam shuǵyl tejeý qoldanǵan. Temir jolda poıyzdyń adamdarmen, avtokóliktermen soqtyǵysýynyń aldyn alǵan sátter kórsetkish boıynsha 94 paıyzdy quraıdy. Tájirıbe kórsetkendeı, tótenshe jaǵdaılardyń deni kóbi azamattardyń qaýipsizdik erejelerin saqatamaýynan bolady, dep habarlady «QTJ» UK» AQ baspasóz qyzmetinen.

Adamdar temirjoldyń qaýipti aımaq ekendigin eskermeıdi: tıisti emes jerlerden ótedi, joldy ótý barysynda qulaqqaptarmen án tyńdap, uıaly telefonmen sóılesedi. Nátıjesinde poıyz mashınıstiniń bergen dabylyn estimeı, jaqyndap qalǵan quramdy baıqamaıdy. «Lokomotıv» AQ qyzmetkerleri jurtshylyq arasynda júıeli túrde túsindirý jumystaryn júrgizedi. Temir jol ótpelerindegi jol qaýipsizdik erejelerimen tanystyryp, qaýipti aımaqtarda «Abaılańyz, poıyz» aktsııalaryn uıymdastyrady. Soǵan qaramastan, poıyz mashınısteri adam densaýlyǵy men ómirine qaýip tóndiretin jaıttarǵa jıi ushyrasady. Jyl basynan beri 203 oqys oqıǵa tirkelgen. Onda 87 adam zardap shegip, avtokólikpen soqtyǵysqan 18 oqıǵa tirkelgen. Poıyz mashınısteriniń qyraǵylyǵy men shuǵyl tejeýdi qoldanýy qaıǵyly oqıǵalardan qutqardy.