Qazaqstanda júrgizýshilerdi oqytý úderisine nemquraıdy qaraǵan avtomektepter jaýapkershilikke tartylady

ASTANA. 29 qazan. QazAqparat - Qazaqstanda júrgizýshilerdi oqytý úderisine nemquraıdy qaraǵan avtomektepter jaýapkershilikke tartylýy múmkin. Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi baspasóz máslıhatynda QR ІІM Ákimshilik polıtsııa komıtetiniń tóraǵasy Igor Lepeha aıtty.

Komıtet basshysynyń sózine qaraǵanda, bundaı sharalar búginde Parlament Májilisi depýtattarynyń qaraýyndaǵy jańa zań jobasynda eskerilgen.

Osy oraıda ol júrgizýshiler mektepterinde tıisti bilim berilmeıtindigin, al oqytý deńgeıi QR ІІM usynyp otyrǵan talaptarǵa saı kelmeıtindigin qadap aıtty.

«Eger de jol-kólik oqıǵasyn tergeý barysynda júrgizýshi qarapaıym talaptardy bilmese nemese tıisti bilim almasa, onda bizde avtomektepterdegi zańdy tulǵalardy jaýapkershilikke tartý múmkindigi bolady. Al bundaı oqıǵa qaıtalanǵan jaǵdaıda jol erejesin buzýshy oqyǵan avtomekteptiń lıtsenzııasyn qaıtarý nemese qyzmetin toqtata turý máselesi tótesinen qoıylady», - dep naqtylap ótti I. Lepeha.

Esterińizge sala keteıik, bıylǵy 11 qazanda QR Úkimetiniń keńeıtilgen otyrysynda Elbasy Nursultan Nazarbaev jol-kólik oıǵalary saldarynan adamdardyń mert bolýy kórsetkishteriniń ósýine alańdaýshylyq bildirgen edi. «Qarańyzdar, ótken jyly joldarda 2145 adam qaza tapty. Osy jyldyń 9 aıynda 2273 adam mert boldy», - dedi QR Prezıdenti otyrys barysynda. Al jaraqat alǵandar 22 myńǵa jetken. Sonymen qatar Elbasy jol erejesin buzýshylarǵa qatysty zań talaptaryn kúsheıtý qajettigin basa aıta kele: «Rólge mas kúıinde otyrǵan júrgizýshi - qylmysker. Ony bizde bar zańmen barynsha qatań jazalaý kerek nemese bul zańdardy kúsheıtý qajet», - dedi.

«Bul - baryp turǵan tártipsizdik. Adamdardan aıyrylýdamyz. Biz mynda olardy emdep, olardyń sanyn ári ómir súrý uzaqtyǵyn arttyrǵymyz keledi. Al jolda olar mert bolýda», - dedi Elbasy.