Qazaqstanda júrgizilip jatqan reformalar sheteldik ınvestorlarǵa úlken múmkindikter beredi – Premer
Vedomstvonyń resmı saıtyndaǵy málimetke qaraǵanda, otyrysty ashqan Premer-Mınıstr qazirgi tańda Úkimet sheteldik ınvestıtsııalardyń aǵynyn saqtaý jáne ulǵaıtý boıynsha keshendi sharalar qabyldap jatqanyn atap ótti. Ótken jyly QR-da $3,6 mlrd-qa 44 jańa ınvestıtsııalyq joba iske qosyldy. Oǵan qosa jalpy quny $55 mlrd bolatyn 700-den astam qoldanystaǵy jáne áleýetti jobalardyń pýly pysyqtaldy.
Qazaqstannyń ınvestıtsııalyq tartymdylyǵyn odan ári arttyrý úshin Úkimet Investıtsııalyq saıasattyń 2026 jylǵa deıingi jańa tujyrymdamasyn ázirledi.
«Jahandyq trendterdi eskere otyryp, joǵary óńdeý ónerkásibine, agroónerkásip keshenine, farmatsevtıkaǵa, kólik-logıstıka ınfraqurylymyna jáne basqa salalarǵa ınvestıtsııalar tartý jumysy jalǵasady», - dep atap ótti Álıhan Smaıylov.
Sondaı-aq Álıhan Smaıylov Memleket basshysy Qasym-Jomart Toqaevtyń «Jańa Qazaqstan» tujyrymdamasy aıasynda demokratııalyq jáne áleýmettik-ekonomıkalyq qaıta qurý jolyna bet alǵan Qazaqstan búginde jańa tarıh betterin ashyp jatqanyn atap ótti.
Ol qoǵam ómiriniń barlyq salalaryn qamtıdy jáne zań shyǵarýshy bılik ınstıtýtyn nyǵaıtýǵa, adal básekelestikti kúsheıtý, jeke menshikti qorǵaý, ekonomıkany demonopolızatsııalaý arqyly ekonomıkany sapaly túrde jańǵyrtýǵa baǵyttalǵan.
«Atalǵan sharalardyń barlyǵy sheteldik ınvestorlarǵa kóptegen ekonomıkalyq múmkindikter týǵyzady. Osy oraıda Qazaqstan – elimizge adal eńbek etip, tabys tabýǵa kelgenderdiń barlyǵy úshin senimdi ınvestıtsııalyq seriktes bolyp qala beretinin taǵy da atap ótkim keledi», - dedi Álıhan Smaıylov.
Otyrysta Premer-Mınıstrdiń orynbasary – Syrtqy ister mınıstri Muhtar Tileýberdi, Ulttyq ekonomıka mınıstri Álibek Qýantyrov, Ekologııa, geologııa jáne tabıǵı resýrstar mınıstri Serikqalı Brekeshev, Eńbek jáne halyqty áleýmettik qorǵaý mınıstri Tamara Dúısenova, Energetıka mınıstri Bolat Aqsholaqov, «Samuryq-Qazyna» qorynyń basqarma tóraǵasy Almasadam Sátqalıev jáne t. b. baıandama jasady.
Sheteldik ınvestorlar tarapynan «Qazaqstannyń Sheteldik ınvestorlar keńesi» qaýymdastyǵynyń basqarma tóraǵasy, «EY» kompanııasynyń basqarýshy seriktesi Erlan Dosymbekov, QR-daǵy «TotalEnerdjıs» basshysy Alem Frıga-Noı, «KNAÝF» kompanııasynyń ókili Dımıtrı Propp, KPMG basqarýshy seriktesi Sáken Jumashev, Reseı men TMD-daǵy GE prezıdenti Bela Ferentsı, «Fılıp Morrıs Interneshnl» basqarýshy dırektory Hýan Eskobar jáne t. b. sóz sóıledi.
Sonymen qatar otyrys barysynda ótken kezeńde Keńestiń barlyq jaýapty memlekettik organdary men uıymdary, sheteldik kompanııalary Keńestiń 33-plenarlyq otyrysynyń hattamalyq tapsyrmalaryn oryndaý boıynsha tıisti sharalardy qabyldaǵany atap ótildi.
Bul rette qorshaǵan ortany jáne sý resýrstaryn qorǵaý, jańartylatyn energııa kózderine kóshý jáne ekonomıkany dekarbonızatsııalaý – keleshekte mańyzy zor strategııalyq maqsattarǵa aınalady, Keńestiń 34-plenarlyq otyrysy osy máselelerge arnalady.
Otyrysty qorytyndylaı kele, QR Premer-Mınıstri Keńes aıasynda aýqymdy jumys júrgizilgenin atap ótti. Aıtylǵan usynystar Úkimette egjeı-tegjeıli pysyqtalady.
«Sheteldik ınvestorlardyń barlyq usynystaryn, sondaı-aq olardyń Qazaqstan aýmaǵyndaǵy ınvestıtsııalyq qyzmetine qatysty týyndaıtyn máselelerdi talqylaýǵa daıyn ekenimizdi taǵy da atap kórsetkim keledi», - dep túıindedi Álıhan Smaıylov.