Qazaqstanda jumysshylar eń kóp jaraqat alatyn salalar ataldy

ASTANA. QazAqparat - 2018 jyldyń alǵashqy úsh aıynda óndiristik jaraqat alý jaǵdaıynyń saldarynan 46 adam kóz jumǵan. Bul týraly Astanada ótken baspasóz máslıhatynda QR Eńbek jáne halyqty áleýmettik qorǵaý mınıstrligi eńbek, áleýmettik qorǵaý jáne kóshi-qon komıtetiniń tóraǵasy Aqmádı Sarbasov málim etti, dep habarlaıdy QazAqparat tilshisi.

Aqmádı Sarbasovtyń aıtýynsha, 2017 jyly eńbek quqyǵynyń saqtalýyna baılanysty tekserilgen kásiporyndardaǵy 1,7 mıllıon jumysshynyń 370 myńy (árbir tórtinshisi) zııandy jáne qaýipti eńbek jaǵdaıynda jumys isteıtini anyqtalǵan.

«Árbir ekinshi qyzmetker (44,2 paıyz) jumys ornynda asa shýly jaǵdaıda eńbek etedi. Al árbir úshinshi eńbekker (33,7 paıyz) jumys ornynda gaz ben shań mólsheriniń belgilengen normadan kóp jaǵdaıyna tap bolady. 84,6 myń adam aýyr jumysqa jegilgen», - dedi Aqmádı Sarbasov.

 

Onyń aıtýynsha, 2017 jyly 673 myńnan astam jumysshy zııandy jumys ornynda eńbek etkeni úshin ártúrli deńgeıde ótemaqy alǵan. Osy maqsatta jumys berýshiler byltyr 170 mlrd teńge aqsha aýdarǵan.

«Ókinishke qaraı, zııandy jumys ornynda eńbek etkeni úshin bólinetin qarajattyń jyl saıyn ósip bara jatqanyn baıqap otyrmyz. 2016 jyldan qaraǵanda 2017 jyly atalmysh baǵytta bólinetin qarajat 8 paıyzǵa ósken», - deıdi ol.

Komıtet tóraǵasy sonymen birge jaraqat alý statıstıkasy týraly málimetti keltirdi.

«Jalpy biz memlekettik organdar men áleýmettik seriktesterdiń arqasynda óndiristik jaraqat alý jaǵdaıy tómendep kele jatqanyn kórip otyrmyz. Sońǵy 3 jylda bul kórsetkish 16 paıyzǵa azaıdy. Dese de, ol joıylyp ketken joq. 2017 jyly 1 678 jumysshy óndiristik jaraqatqa dýshar bolǵan. Onyń ishinde ókinishke qaraı 244 adam qaıtys boldy. 2018 jyldyń alǵashqy toqsanyna keletin bolsaq, 317 óndiristik jaraqat alý jaǵdaıy tirkeldi. Onyń ishinde 46 adam kóz jumdy», - dedi Aqmádı Sarbasov.
 

Belgili bolǵandaı, óndiristik jaǵdaıda zardap shekkenderdiń kóbi taý-ken keshenderi (16 paıyz) men qurylys salasynda (15 paıyz) eńbek etken.

«Aımaqtar boıynsha: Mundaı jaǵdaılardyń kóbi Shyǵys Qazaqstanda tirkeledi. Ol óńirde 2017 jyly 215 adam zardap shekken. Sol sekildi Qaraǵandy oblysynda byltyr 190 adam, Pavlodar oblysynda 183 óndiristik jaraqat alǵan», - dedi komıtet tóraǵasy.