Qazaqstanda jumys isteıtin sheteldik ınvestorlar eldegi tsıfrlandyrý úderisin damytýǵa nıetti

ALMATY. QazAqparat- Investorlar tarapynan zamanaýı tehnologııalardy damytý basymdyqtary Digital Almaty halyqaralyq forýmy aıasynda «Investors' Choice: tsıfrlandyrý Qazaqstannyń ınvestıtsııalyq tartymdylyǵyn qalaı arttyra alady» paneldi sessııasynda talqylandy, dep habarlaıdy QazAqparat tilshisi.

Qazaqstanda jumys isteıtin sheteldik ınvestorlar eldegi tsıfrlandyrý úderisin damytýǵa nıetti ekenderin jetkizdi.

Bul taqyryp bıyl QR Prezıdenti janyndaǵy sheteldik ınvestorlar keńesiniń 35-otyrysynda talqylanatyn bolady.

Sessııa moderatory, KPMG Caucasus jáne Central Asia basqarýshy seriktesi Sáken Jumashevtyń aıtýynsha, táýelsizdik jyldary Qazaqstan ekonomıkasyna 370 mlrd dollar ınvestıtsııa tartylǵan. Biraq bul somanyń basym bóligi óndirýshi sektorlarǵa berildi. Dese de qazir damý vektory ózgerýde.

Tsıfrlyq damý, ınnovatsııalar jáne aeroǵarysh ónerkásibi vıtse-mınıstri Áset Turysov qazirgi álemde kez kelgen salany tsıfrlandyrýsyz elestetý múmkin emes ekenin aıtty. Al tehnologııalyq protsester, óz kezeginde, barlyq eldiń úkimet josparyna túzetýler engizip jatyr.

Qazaqstan Úkimeti tsıfrlandyrý trendin burynnan qolǵa alǵan. Qazir Tsıfrlyq damý mınıstrligi ýákiletti organ retinde osy saladaǵy zańnamany jetildirý boıynsha jumys júrgizýde.

«Biz Qazaqstanǵa kelgen ınvestorlardyń ózderin jaıly sezinýi úshin qalypty zańnamalyq baza jasaý maqsatynda jumys istep jatyrmyz. Bul óte mańyzdy, sebebi tsıfrlandyrý zańnamalyq turǵydan da kúsheıtilýi tıis», - dep túsindirdi Áset Turysov.

Sonymen qatar, ol sektorlardyń ınvestıtsııalyq tartymdylyǵyn qura otyryp, Úkimet dástúrli, jalpy qabyldanǵan talaptardy ǵana emes, onyń ishinde salyq saıasatynyń turaqtylyǵyn, zańnamanyń ústemdigin eskeretinin jáne adam kapıtalyn damytýǵa erekshe nazar aýdarylatynyn atap ótti.

«Qazaqstandyq Sheteldik ınvestorlar keńesi» qaýymdastyǵynyń dırektory Janna Baıdasheva ınvestorlar qandaı da bir elge ınvestıtsııa salý týraly sheshim qabyldaǵanda, árqashan birneshe faktorǵa, ıaǵnı zań ústemdigine, salyq zańnamasyna, salyq júıesine, adamdardyń áleýetine jáne tehnologııalyq faktorlarǵa qaraıtynyn rastady.

«Qazaqstandy bıznes júrgizý kópiri kóretin ınvestorlar aıtqandaı, Qazaqstanda tsıfrlandyrý deńgeıi qazir óte jaqsy. Biz óńir boıynsha birinshimiz. Ári qaraı, árıne, bıznespen birlese tsıfrlyq kún tártibin damytýdy josparlap otyrmyz», - dedi Janna Baıdasheva.