Qazaqstanda jumyrtqa óndirisi 7,8%-ǵa artty
Aýyl sharýashylyǵy, Saýda jáne ıntegratsııa mınıstrlikteri men Qazaqstan qus ósirýshiler odaǵy, Jumyrtqa óndirýshiler qaýymdastyǵy, saýda jelileri men Qus fabrıkalary odaǵynyń basshylary Qazaqstandaǵy qus sharýashylyǵynyń ózekti máselelerin talqylady.
Jumyrtqa óndirýshiler qaýymdastyǵynyń málimetinshe, 2022 jyldyń 9 aıynda qazaqstandyq qus fabrıkalary 2 mlrd 790 myń dana jumyrtqa óndirgen. Bul – bir jyl burynǵy uqsas kezeńnen 7,8% artyq jáne atalǵan kólem ishki naryqtyń qajettiligin qamtamasyz etý úshin jetkilikti.
Jumyrtqa sharýashylyǵyn damytý úshin óndirýshilerge memlekettik qoldaý kórsetiledi. Aýyl sharýashylyǵy mınıstrligi táýliktik balapandardy bir basyna 60 teńge kóleminde satyp alýdy sýbsıdııalaıdy. Budan bólek, sýbsıdııalaý qaǵıdalaryna tolyqtyrýlar engizildi, oǵan sáıkes naqty óndiris úshin jylyna 5 mln danadan 3 teńge normatıvpen jumyrtqa qunyn arzandatý úshin qoldaý qaıta qalpyna keltirildi.
Jalpy, bıyl jumyrtqa óndirisin sýbsıdııalaýǵa 7,5 mlrd teńge bólindi.
Qus sharýashylyǵy uıymdarynyń sýbektilerin memlekettik qoldaý sharalary sheńberinde Aýyl sharýashylyǵy mınıstrligi, salalyq qaýymdastyqtar, Qazaqstan qus ósirýshiler odaǵy, sondaı-aq «Azyq-túlik korporatsııasy» UK» AQ arasynda memorandým jasaldy. Oǵan sáıkes, Azyq-túlik korporatsııasy mal jáne qus sharýashylyqtaryna tonnasyn 117 myń teńge baǵamen 150 000 tonna astyq satady, bul – naryqtyq qunynan 30% tómen. Sondaı-aq, jemdik astyqty jóneltý boıynsha mindettemeler tolyq kólemde oryndaldy. Atalǵan memlekettik qoldaý tetigi kelesi jyly da jalǵasady. Bul maqsatta azyq-túlik korporatsııasy 2023 jylǵa arnalǵan jem qoryn qurady.