Qazaqstanda jumys isteıtin sheteldik kompanııalardyń jartysyna jýyǵy reseılik – Memleket basshysy

<p>ASTANA. KAZINFORM &ndash; Memleket basshysy Qasym-Jomart Toqaev Reseı prezıdenti Vladımır Pýtınniń Qazaqstanǵa jasaǵan memlekettik sapary aıasynda ótken brıfıngte eki aradaǵy ınvestıtsııalyq baılanystardyń negizgi kórsetkishterin atady.</p>

«Aldaǵy eki jylda ózara saýdanyń kólemin 30 mıllıard dollardan asyra alatynymyzǵa senimdimin. Qazaqstan ekonomıkasyna tartylǵan reseılik ınvestıtsııanyń kólemi 24 mıllıard dollardan asty. Osy somanyń 4,5 mıllıard dollardan astam bóligi keıingi eki jylda ǵana salyndy. Reseı ekonomıkasyna baǵyttalǵan qazaqstandyq ınvestıtsııa kólemi 8,5 mıllıard dollar boldy», - dedi Memleket basshysy.

Prezıdent Qazaqstanda Reseıdiń úlesi bar 24 myńǵa jýyq kompanııa jumys isteıtinin eske saldy.

«Bul bizdiń elde jumys isteıtin sheteldik kásiporyndardyń jartysyna jýyǵy degen sóz. Osynaý kórsetkishter bizdiń strategııalyq qarym-qatynastarymyzdy odan ári nyǵaıtýǵa degen senim men ózara qyzyǵýshylyqtyń deńgeıi joǵary ekenin aıǵaqtaıdy», - dedi Qasym-Jomart Toqaev.