Qazaqstanda jumyrtqany tereń óńdeıtin alǵashqy zaýyt 2025 jyly salynady

<p>ASTANA. KAZINFORM — Vıtse-premer Serik Jumanǵarın «Kýrochka rıaba» brendimen ónim shyǵaratyn «CAPITAL projects LTD» JShS-nyń qýaty jylyna 20 myń tonna taýyq etin óndiretin fabrıkasy ornalasqan Aqmol aýylynda boldy. Memlekettik qoldaýdyń kómegimen jaqyn arada óndiris qýatyn 30 myń tonnaǵa deıin arttyrý josparlanyp otyr.</p>

Foto: primeminister.kz

Kásiporyn taýyq eti men jumyrtqa óndirisiniń tolyq tsıklin qurǵan «Shańyraq» kompanııalar tobyna kiredi: analyq mal — ınkýbatsııalyq jumyrtqa — ınkýbator — reprodýktor — taýyq eti jáne jumyrtqa — taratý.

Sonymen qatar jem óndirý jáne eksporttaý úshin aýylsharýashylyq daqyldaryn ósiredi. Kásiporyn eń az qaldyqpen jumys isteıdi, tipti taýyq kóńi de daqyl ósirýde paıdalaný úshin organıkalyq tyńaıtqyshtarǵa óńdeledi.

Qazirgi ýaqytta maıly daqyldardy qaıta óńdeý jelisi salynyp jatyr, bul óz jemshóp óndirisin 25%-ǵa arzandatýǵa múmkindik beredi.

Foto: primeminister.kz

Bul taýyq jumyrtqasy men qus etiniń baǵasyna oń áser etedi, óıtkeni jem osy ónimderdiń ózindik qunynyń negizgi jáne eń qymbat quramdas bóligi bolyp sanalady.

Kásiporyn táýligine 1 mln jumyrtqa óndiretin pasterlengen suıyq jáne qurǵaq jumyrtqa ónimderin shyǵarýmen aınalysady. Bul taýyq jumyrtqasyn tereń óńdeıtin elimizdegi alǵashqy zaýyt bolmaq.

Kásiporyn qazirdiń ózinde tehnologııasy Qazaqstanda belgilenetin, jumyrtqa ónimderin óndirý boıynsha álemdik kóshbasshy Thornico (Sanovo) kompanııasymen eksklıýzıvti kelisimge qol qoıdy,

Bul jobany kelesi jyly jeńildetilgen nesıeleý túrinde memlekettiń qoldaýymen júzege asyrý josparlanýda. Vıtse-premer atalǵan jobany qoldap, onyń elimizdegi AÓK salasynda tereń qaıta óńdeýdi damytý qajettigin atap ótti.

Foto: primeminister.kz

Kásiporynda ylǵal astyqty saqtaýdyń jańa ári qoljetimdi ádisteri qoldanylady. Munda 8 jyldan beri ylǵaldyǵy 18-20% bolatyn astyqty saqtaýǵa arnalǵan plastık qapshyqtar qoldanylady.

Bul pishinde ony alty aı boıy qaýipsiz saqtaýǵa, kóktemde ashyp, keptirip, ári qaraı saqtaýǵa bolady. Kásiporyn basshysy Maksım Bojkonyń aıtýynsha, otteginiń bolmaýyna baılanysty astyq jyl boıyna óte jaqsy saqtalady.

Foto: QR Úkimeti