Qazaqstanda jumyrtqadan tapshylyq bolmaıdy, rezervimiz jetkilikti — vıtse-mınıstr
Elimizdiń Aýyl sharýashylyǵy vıtse-mınıstri Amanǵalı Berdalın Pavlodar oblysyna jumys sapary aıasynda otandyq naryqtaǵy qus jumyrtqasynyń qazirgi jaı-kúıi jaıynda oı bólisti.
Onyń aıtýynsha, Qazaqstanda taýyq jumyrtqasy boıynsha eshqandaı tapshylyq joq.
— Otandyq naryqta qus jumyrtqasy barynsha jetkilikti ekeni baıqalyp otyr. 2022 jyly otandyq óndirýshiler 5 mlrd dana, byltyrǵy jyldyń alǵashqy 11 aıynda 4,9 mlrd dana jumyrtqa óndirgen. Jumyrtqanyń bul kólemi eldegi suranystyń 102 paıyzyn quraıdy. ıAǵnı, kásipkerlerdiń qolynda syrtqa shyǵarýǵa arnalǵan artyq ónim bar degen sóz. Onyń ústine qazir elimiz boıynsha 10 qus fabrıkasynyń (jumyrtqa baǵytynda) qurylysy júrgizilip jatyr. Aldaǵy ýaqytta bizdiń mınıstrlik mundaı óndiristik kásiporyndar joq Ulytaý, Jetisý, Mańǵystaý, Shyǵys Qazaqstan, Abaı oblystarynda 25 paıyzdyq ınvestsýbsıdııa engizýdi josparlap qoıdy. Ótken jyldyń alǵashqy 11 aıynda óndirýshilerimiz syrtqa 264 mln dana jumyrtqa eksporttaǵan. Eger otandyq naryqta shyn máninde jetispeýshilik bolsa, biz ákimshilik amal qoldanyp oǵan jol bermes edik. Tek Aýǵanstanǵa 10 aı ishinde 115 mln dana jumyrtqa jiberippiz. Jalpy Reseı, Aýǵanstan jáne ózge de elderge eksporttalyp jatyr, -deıdi vıtse-mınıstr.
Agroónerkásip kesheninde 34 broıler tıpindegi jáne 32 jumyrtqa baǵytyndaǵy fabrıkalar bar.
Investıtsııalyq sýbsıdııadan bólek, kásipkerlerge bir kúndik balapan satyp alǵany úshin 60 teńgeden demeýqarjy tólenedi.
Buǵan qosa aldaǵy aılarda jumyrtqa óndirý boıynsha ishki rezervter iske qosyla bastaıdy dep kútilýde. Bul degenimiz — buǵan deıin toqtap qalǵan fabrıkalardy qaıta júrgizý.
— Qazaqstan boıynsha jumyrtqa óndirip kelgen 5 fabrıkanyń jumysy toqtap tur. Biz erteńnen bastap olardyń máselesin talqylaýdy bastaımyz. Árqaısysynyń toqtaý sebebin anyqtap, tezirek iske qosylýyna múddelimiz. Eger qarajat tapshylyǵynan turyp qalǵan bolsa, bıýdjetten qarjy beriledi. Keıbir kásiporyndar jergilikti naryqta jumyrtqanyń kóbeıip ketýinen tejelip qalǵan bolýy múmkin. Mundaı óndiris oryndaryna jumysyn qaıta jańǵyrtýǵa jaǵdaı jasalady. Qazir jumyrtqanyń baǵasy ósti, onyń bosatý quny kásipkerler úshin tıimdi. Osyndaı rezervter esebinen aldaǵy ýaqytta Reseı eline jumyrtqa eksportyn joǵary deńgeıde uıymdastyrýǵa múmkindik bar. Al ózimizdiń naryqta tapshylyq qalyptaspaıdy, bizde qor jetkilikti, — dep naqtylady spıker.
Aıtyp óteıik, aýyl sharýashylyǵy mınıstrligi et baǵytyndaǵy qus fabrıkalarynyń da qaıta jandanýyna yqylas tanytyp otyr.
Pavlodar oblysynda buǵan deıin Qyzyljar qus fabrıkasy toqtap qalǵan edi.
Jaqyn ýaqytta memleket qoldap jiberse, kásiporynnyń tamyryna qaıta qan júgirýi ǵajap emes.