Qazaqstanda JRVI juqtyrý 20 paıyzǵa ósti

ASTANA. QazAqparat – Epıdemıologııalyq maýsym bastalǵaly beri JRVI-diń 2,9 mln jaǵdaıy tirkeldi. Bul týraly Densaýlyq saqtaý vıtse-mınıstri – bas memlekettik sanıtar dáriger Aıjan Esmaǵambetov aıtty, dep habarlaıdy QazAqparat tilshisi.

«Respýblıkada JRVI jáne tumaý boıynsha epıdemıologııalyq maýsym jalǵasyp jatyr. Epıdemıologııalyq maýsym bastalǵaly beri JRVI-diń 2,9 mln jaǵdaıy jáne tumaýdyń 3 009 jaǵdaıy tirkeldi. Ótken jyldyń osyǵan uqsas kezeńimen salystyrǵanda syrtqattaný 20 paıyzǵa ósti. Biraq jeltoqsan aıymen salystyrǵanda qańtarda bul kórsetkishtiń tómendegeni baıqalady», - dedi ol Ortalyq saılaý komıssııasy otyrysynda.

Onyń atap ótýinshe, jiti respıratorlyq vırýstyq ınfektsııa jáne tumaý maýsymy jyl saıyn qazan aıynan bastalyp, sáýir aıyna deıin jalǵasady.

Aǵymdaǵy maýsym tumaý vırýsynyń erte aınalymda bolýymen erekshelenedi. Búgingi kúni tumaýdyń 2 túri - A (A(H3N2), A(H1N1) jáne V túrleri kezdesedi.

«Respýblıkamyzda koronavırýs ınfektsııasy boıynsha aǵymdaǵy jaǵdaıdy, sondaı-aq JRVI jáne tumaýmen syrqattaný boıynsha epıdemıologııalyq maýsymnyń aǵymyn eskere otyryp, kandıdattardy usyný júrgizý kezinde: kandıdattardy usyný boıynsha sezd, konferentsııa ótkizgen kezde keń úı-jaıdy paıdalaný; úı-jaıda jeldetkish/aýa baptaý júıeleriniń úzilissiz jumys isteýin; R kórsetkishi birden joǵary aımaqtarda maska rejımin saqtaýdy usynamyz», - dedi ol.