Qazaqstanda joıylyp bara jatqan janýarlar túrleriniń bıobanki qurylýy múmkin

NUR-SULTAN. QazAqparat – Qazaqstanda sırek kezdesetin jáne joıylyp bara jatqan janýarlar túrleriniń bıobankin qurý máselesi talqylanyp jatyr. Bul týraly QR Ekologııa, geologııa jáne tabıǵı resýrstar mınıstrligi Orman sharýashylyǵy jáne janýarlar dúnıesi komıteti tóraǵasynyń orynbasary Danııar Turǵambaev aıtyp berdi, dep habarlaıdy QazAqparat tilshisi.

«Sybaılas jemqorlyqty azaıtý maqsatynda ınspektorlardy merzimdi rotatsııalaý júıesi ázirlenip jatyr. «Ohotzooprom» ÓB RMQK materıaldyq-tehnıkalyq bazasyn jańartylyp, beınetirkeý júıelerimen jaraqtandyrý jumystary júrýde. Qorǵanys keýdesheleri, kisender, rezeńke taıaqtar, avtokólikti májbúrlep toqtatýǵa arnalǵan qurylǵylar satyp alyndy. QR ІІM-men birlesip «Ohotzooprom» ınspektorynyń túrli jaǵdaılarǵa is-qımyl algorıtmi ázirlendi. Odan basqa, ІІM quqyq buzýshylardy ustaý negizderi, Qylmystyq jáne Qylmystyq is júrgizý kodeksteriniń, Ákimshilik quqyq buzýshylyq kodeksi normalaryn qoldaný, qarý ustaý qaýipsizdigi, taktıkalyq-arnaıy daıarlyq qaǵıdalary boıynsha arnaıy oqý baǵdarlamasyn ázirledi. 2019 jyldan bastap ІІM oqý ortalyqtarynda «Ohotzoopromnyń» 315 ınspektoryna oqý kýrstary ótkizildi», - dedi D. Turǵambaev Ortalyq kommýnıkatsııalar qyzmetinde ótken baspasóz máslıhatynda.

Onyń aıtýynsha, bıyl jol júrisi qaǵıdalaryna tolyqtyrýlar engizildi jáne kólikter arnaıy jaryq, dybys sıgnaldarymen jabdyqtalyp, arnaıy tústi-grafıkalyq shemalary boıynsha boıalýy qajet.

«Avtokólikterdiń tústik grafıkalyq shemalary bizdiń ınspektorlardy memlekettik organnyń ókilderi retinde sáıkestendirýge múmkindik beredi. Ýákiletti organ vedomstvosynyń, janýarlar dúnıesin qorǵaý, ósimin molaıtý jáne paıdalaný salasyndaǵy qyzmetti júzege asyratyn jergilikti atqarýshy organdardyń jáne mamandandyrylǵan uıymdardyń materıaldyq-tehnıkalyq quraldaryn jaraqtandyrý normatıvteri ázirlendi. Bul normatıvterde avtomotokólik jáne júzý quraldarymen jáne basqa da mamandandyrylǵan quraldarmen: ushý apparatymen, eholotpen, teplovızormen, túnde kórý quraldarymen jabdyqtaý kózdelgen», - dep atap ótti spıker.

Sonymen birge, Reseıdiń Tabıǵı resýrstar jáne ekologııa mınıstrligi men Qazaqstannyń Ekologııa, geologııa jáne tabıǵı resýrstar mınıstrligi arasynda kıiktiń transshekaralyq taralymdaryn qorǵaý, ósimin molaıtý jáne paıdalaný jóninde kelisimge qol qoıyldy.

«QR BǴM «Ulttyq bıotehnologııa ortalyǵy» RMK-men bıoalýantúrlilikti saqtaý úshin Qazaqstannyń sırek kezdesetin jáne joıylyp bara jatqan janýarlar túrleriniń bıobankin qurý máselesi pysyqtalýda», - dedi D. Turǵambaev.