Qazaqstanda JOO-dan keıingi bilim berý salasyna birshama ózgerister enýi múmkin
«Jınalysta kelesi usynystar aıtyldy: birinshi, doktoranttarǵa Qazaqstan tarıhy, qazaq fılosofııasy, qazaq tili men ádebıeti sııaqty gýmanıtarlyq beıindegi birqatar baǵyttyń ereksheligin eskere otyryp, qoldanystaǵy talaptarǵa (WoS jáne Scopus tizbesine kiretin basylymdarda maqalalar jarııalaý) birneshe balama nusqalardy qosý usynyldy. Atap aıtqanda:
a) KOKSON tizimine engizilgen jýrnaldarda 5 maqala jáne ǵylymı konferentsııalardan 2 materıal;
b) senimdi baspalarda monografııa shyǵarý (Elsevier, Brill, CRC Press, DeGruyter, Edward Elgar Publishing, Springer Nature jáne basqalary), sondaı-aq US News Best Global Universities Rankings, Academic Ranking of World Universities nemese Times Higher Education World University reıtınginiń top-100 quramyna kiretin ýnıversıtetterde», - delingen mınıstrdiń paraqshasynda.
Ol byltyr KOKSON tizimine engizilgen ǵylymı jýrnaldarǵa qoıylatyn talaptar edáýir kúsheıtilgenin jáne tizimnen álsiz jýrnaldar alynyp, eski tizim tolyq jańarǵanyn eske salady. Sol sebepti bul sheshim osy jumystyń qısyndy jalǵasy sanalady. Árıne, tolyqqandy dáıeksóz júıesi boıynsha jumys sozylyp ketti, biraq soǵan qaramastan onyń qorytyndysy shyǵarylady.
«Ekinshi. Sondaı-aq, WoS jáne Scopus tizimine engizilgen jáne sanktsııaǵa baılanysty derekter qorynan joıylǵan ǵylymı jýrnaldarda granttyq qarjylandyrý aıasynda jarııalanǵan qazaqstandyq ǵalymdardyń maqalalaryn, eger bul maqalalar buǵan deıin jarııalanýǵa qabyldanǵan bolsa, olardy taný múmkindigi talqylandy. Budan bólek, engizý merzimi keıinge shegerile otyryp, (2023 jyldan bastap) mynadaı sharalar usynyldy:
1. Doktoranttardy qabyldaý boıynsha. Doktorantýraǵa túsý kezinde úmitkerlerge ózderiniń bolashaq dıssertatsııasynyń ǵylymı negizdemesin (research proposal) usyný usynyldy.
2. Doktoranttardyń zertteý quzyrettiligi boıynsha. Buǵan deıin biz doktoranttardyń «Akademııalyq hat», «Ǵylymı zertteý ádisteri» pánderin mindetti túrde oqýyn engizdik. Bul quzyretter kez kelgen doktorantqa ǵylymı zertteýlerdi óz betinshe oryndaý úshin qajet. Osy pánderdi meńgerý úshin biliktilik emtıhanyn ótkizý usynylady.
3. Ǵylymı basshylyq boıynsha. Bir ǵylymı jetekshige 15 doktorant, keıin birinshisi qorǵaýdan óte almaǵan jaǵdaıda taǵy beseýin bekitý tájirıbesi durys emes. Búgingi tańda ǵylymı jetekshiler kóp jaǵdaıda doktoranttarmen jumys isteýge jetkilikti kóńil men ýaqyt bólmeıdi. Bul máseleni sheshý úshin júıeli sharalar qajet», - deıdi Ashat Aımaǵambetov.
Mınıstr osy usynystardy qosymsha saraptama men talqylaýdan ótkizgennen keıin naqty sheshim qabyldanatynyn aıtady.