Qazaqstanda jol jóndeýshi jumysshylar jetispeıdi

NUR-SULTAN. QazAqparat – Qazaqstannyń eńbek naryǵynda jol jóndeý jumysshylarynyń tapshylyǵy baıqalady, dep habarlaıdy QazAqparat Eńbek jáne halyqty áleýmettik qorǵaý mınıstrliginiń baspasóz qyzmetine silteme jasap.

Mınıstrliktiń habarlaýynsha, elektrondy eńbek bırjasynda (EEB) jarııalanǵan 12 myńnan astam bos jumys ornyna 3 myń túıindeme ornalastyrylǵan. Eń kóp suranysqa ıe bilikti mamandyqtar «bestigine» tas qalaýshy (1912 bos oryn), betonshylar (1861), kúzetshiler (1816) jáne medbıkeler (meıirgerler) (1637) engen.

«Mundaı qorytyndyǵa 2020 jyldyń II toqsanyndaǵy «Qazaqstandaǵy bilikti eńbekke degen usynys pen suranysty taldaý» zertteýiniń nátıjeleri boıynsha WDC (Mınıstrliktiń janyndaǵy Eńbek resýrstaryn damytý ortalyǵy) taldaýshylary keldi. Joǵaryda kórsetilgen kezeńde bilikti jumyskerler úshin EEB-da barlyǵy 163 myń bos jumys orny ornalastyryldy. Al bilikti mamandar túıindemeleriniń sany 106 myńdy qurady», - dep habarlaıdy Eńbek jáne halyqty áleýmettik qorǵaý mınıstrliginen.

Osy jyldyń ІІ toqsanynda bilikti jumysshylarǵa degen qajettilik ásirese Almaty qalasynda (22,5 myń), Qaraǵandy oblysynda (17,4 myń), Qostanaı oblysynda (16,4 myń) jáne Nur-Sultan qalasynda (16 myń) baıqalǵan.

«Sáýir aıynda aı saıynǵy dınamıkada jyl basynan beri bos jumys oryndarynyń eń az sany, ıaǵnı 25 myńnan sál artyq jumys orny ornalastyrylǵan. Biraq mamyr aıynda karantın rejıminiń birtindep álsireýi jáne jumyspen qamtý baǵdarlamasyn júzege asyrý aıasynda bos jumys oryndarynyń sany 2,8 esege ósti», – deıdi WDC boljaý departamentiniń dırektory Dmıtrıı Shýmekov.

Sarapshylardyń aıtýynsha, bilikti eńbekke qatysty ornalastyrylǵan bos jumys oryndarynyń jartysynan kóbi eki kásibı topqa: kásipqoılar men ónerkásip, qurylys, kólik jáne basqa da uqsas salalardyń jumysshylaryna baǵyttalǵan.