Qazaqstanda jol salasy mamandarynyń tsıfrly banki qurylady
Baspasóz qyzmetiniń málimetterine qaraǵana, elimizdiń jol salasy kóptegen jyldar boıy bilikti mamandardyń tapshylyǵy qalyptasqan salalardyń biri. Nátıjesinde, júzege asyrylyp jatqan jol qurylysy jumystarymen kóbinese beıindi bilimi nemese joǵary bilimi týraly dıplomy joq adamdar aınalysyp jatady.
Mamandardyń aıtýynsha, atalǵan máseleniń týyndaýyna negizgi bes sebep bar. Atap aıtqanda, jol salasyndaǵy ǵylymdy qarjylandyrýdyń jetispeýshiligi, joǵary oqý oryndarynyń túlekterin jetkiliksiz kólemde daıarlaý, jumys istep júrgen mamandardyń óz biliktiligin arttyrýǵa qyzyǵýshylyq tanytpaýy, qoldanystaǵy kásipqoılar pýlynyń sany men sapasy týraly naqty túsiniktiń bolmaýy, sondaı-aq qajet qyzmetkerlerdi tabý barysynda týyndaıtyn basqa da qıyndyqtar.
Osy máselelerdi sheshý úshin kezinde «Sáýlet jáne qurylys» baǵytyna engizilgen «Avtojoldar men áýeaılaqtar qurylysy» mamandyǵy boıynsha stýdentterdi daıarlaýdyń jekelegen baǵytyn qaıta ashý usynylyp otyr.
Sonymen qatar jobalardyń ǵylymı saraptamasyn júzege asyrý men jol salasy ǵylymyn damytýǵa jol salý qunynyń 0,5 paıyzyn bólý týraly erejeni zańnamalyq turǵydan bekitý de usynylǵan.
Máseleniń balama sheshimi retinde Qazaqstan jol ǵylymı-zertteý ınstıtýty jol salasy qyzmetkerlerin daıarlaý, qaıta daıarlaý jáne olardyń biliktiligin arttyrýmen aınalysatyn oqý ortalyǵynyń jumysyn jandandyrdy. Onda tek stýdentter ǵana emes, sonymen qatar tájirıbeli mamandar da bilim alady. Sondaı-aq elimizdiń joǵary oqý oryndarymen birqatar memorandýmǵa qol qoıyldy. Osylaısha, jaqyn arada qazaqstandyq stýdentter naqty zerthanalarda jáne joldardyń tájirıbelik ýchaskelerinde tájirıbeden óte alady. Búgingi tańda jol ǵylymı-zertteý ınstıtýty zań jobasyn ázirleý boıynsha jumys istep jatyr, oǵan sáıkes avtojol mamandary óz biliktilikterin arttyrýǵa mindetti bolady.
Bıyl QazjolǴZI jol salasy mamandarynyń biryńǵaı biliktilik bazasyn, atap aıtqanda salalyq eńbek bırjasynyń bir túrin ázirleýmen aınalysty.
Aqparattyq júıege kásibı jolshylardy daıarlaýmen aınalysatyn joǵary oqý oryndarynyń stýdentteri men túlekteri, sondaı-aq búginde jumys istep júrgen ınjenerler, sheberler, jobalaýshylar jáne jol qurylysynyń basqa da mamandary engiziletin bolady.
Bul sheshim óz kezeginde salalyq eńbek naryǵyn taldaýǵa jáne boljaýǵa múmkindik beredi. Al merdiger uıymdar onlaın rejımde joldardy jobalaý, olardyń qurylysy jáne qaıta qurý úshin dıplomy bar ári bilikti mamandardy taba alady.
Mundaı tsıfrly anyqtamalyqty jasaý jol mamandary úshin ózderiniń kásibı daǵdylaryn jumysty qatar alyp júrip damytýǵa kómektesedi.
«Bazada mamandardyń eńbek ótili men sanaty týraly málimetter jınaqtalǵan. Olardyń biliktilikteri týraly aqparat ta qoljetimdi bolady. Bul óz kezeginde kadr tapshylyǵy máselesin sheshýge járdemdesip, sáıkesinshe jol qurylysynyń sapasyna oń áser etedi», deıdi «QazjolǴZI» AQ Oqý ortalyǵynyń dırektory Gúljamal Omarova.
Qazirgi ýaqytta ınstıtýt atalǵan júıeniń jobasyn jasap, óziniń avtorlyq quqyǵyn aldy. Tsıfrly baza 2023 jyldan bastap tolyqtyryla bastaıdy dep josparlanyp otyr.