Qazaqstanda jol-kólik apaty kóbeıgen

ASTANA. QazAqparat – Premer-Mınıstrdiń birinshi orynbasary Roman Sklıar eldegi jol-kólik apaty týraly statıstıkalyq derekterdi jarııalady, dep habarlaıdy QazAqparat tilshisi.

«Resmı statıstıkaǵa sáıkes, 2022 jyldyń qorytyndysy boıynsha jol-kólik oqıǵalary 6%-ǵa, olardan qaıtys bolǵan azamattar sany 7%-ǵa jáne jaralanǵandar 6%-ǵa ósken. Taldaý kórsetkendeı, joldaǵy apat statıstıkasynyń nasharlaýy 2020-2021 jyldardaǵy pandemııa kezeńinde engizilgen shekteýler aıasynda bolyp otyr. 2019 jylmen salystyrǵanda apat sany shamamen 11%-ǵa, jaralanǵandar 14%-ǵa qysqardy, qaıtys bolǵandar sany is júzinde sol deńgeıde qaldy», - dep jaýap berdi R. Sklıar depýtat saýalyna.

Oǵan qosa, keıingi jyldary elimizde avtokólik sany ósip keledi jáne 4,7 mln kólik quraly bar (2019 jyly – 4,1 mln, 2020 jyly – 4,2 mln, 2021 jyly – 4,3 mln).

Barlyq jol-kólik apatynyń 75%-ǵa jýyǵy eldi mekenderde, «ólimge ákep soǵatyn» JKO jartysyna jýyǵy qala syrtyndaǵy trassalarda bolady. Árbir úshinshi jol-kólik oqıǵasyna ushyraýshy, qaıtys bolǵan jáne jaralanǵan árbir tórtinshi adam – jaıaý júrginshiler. JKO-nyń negizgi sebepteri júrgizýshilerdiń jyldamdyq rejımderin asyrýy jáne jaıaý júrginshilerdiń jol júrý qaǵıdalaryn buzýy bolǵandyqtan, polıtsııa tıisti den qoıý sharalaryn kúsheıtken.