Qazaqstanda jol qaýipsizdigin baǵalaýdyń halyqaralyq júıesi engizile bastady
Vedomstvonyń baspasóz qyzmetiniń málimetinshe, jobany shvetsııalyq SweRoad kompanııasy «Qazaq jol qozǵalysy qaýipsizdigi ǵylymı-zertteý ınstıtýtymen» birlesip júzege asyrýda.
Jyl saıyn jol apatynan álemde 1,35 mıllıon adam qaza tabady. Bul ózekti máselege halyqaralyq deńgeıde kóp kóńil bólinýde. Birikken Ulttar Uıymy aldaǵy on jylda jol apatynan bolatyn qaıǵyly oqıǵalar sanyn 2 esege azaıtý mindetin qoıyp otyr.
Qazaqstanda jol qaýipsizdigin baǵalaýdyń halyqaralyq IRAP júıesin engizý jobasyn júzege asyrý sheńberinde respýblıkalyq jáne qalalyq avtomobıl joldarynyń 6 200 shaqyrymynda baǵalaý jumysy júrgiziletin boldy. Ony «Jol aktıvteri sapasynyń ulttyq ortalyǵy» RMK men «Qazaqstan jol ǵylymı-zertteý ınstıtýty» AQ-nyń bilikti mamandary júrgizedi.
«Baǵalaý jumysy arnaıy qondyrǵymen jabdyqtalǵan avtomobıl arqyly júrgiziledi. Málimetter 50-den astam parametr boıynsha ár 100 metr saıyn jazylyp otyrady. Juldyzdy reıtıng 5 upaılyq shkala boıynsha jol qozǵalysynyń barlyq qatysýshylary úshin bólek-bólek beriledi. Jol qozǵalysy qatysýshylarynyń barlyǵy tıisti kóńilsiz qaldyrylmaıtyndyqtan mundaı ınklıýzıvti shara júıeniń tıimdiligin arttyrady. Juldyzdy reıtıng anyqtalǵannan keıin jol-kólik oqıǵasy táýekelderiniń deńgeıin tómendetýge baǵyttalǵan ınvestıtsııalyq jospar jasalady, soǵan sáıkes kemshilikter túzetilip, jetildirilip otyrýy tıis», delingen habarlamada.
Bul ádis tek qaýiptiligi joǵary jerlerdi anyqtap qana qoımaı, sonymen qatar barlyq jol ýchaskelerin tolyq taldaýǵa, apat deńgeıi tómen, eń qaýipsiz bólimdi qalaı jaqsartýǵa bolatyndyǵyn baǵalaýǵa múmkindik beredi.
Joba jol qozǵalysy qaýipsizdigi salasynda ulttyq sarapshylardyń áleýetin joǵarylatýǵa, halyqaralyq deńgeıde baǵalaý sharalaryn júrgize alatyn mamandardyń pýlyn qalyptastyrýǵa septigin tıgizbek. Joba nátıjesi boıynsha «Jol aktıvteri sapasynyń ulttyq ortalyǵy» RMK, «Qazaqstan jol ǵylymı-zertteý ınstıtýty» AQ, «Qazaq jol qozǵalysy qaýipsizdigi ǵylymı-zertteý ınstıtýty» JShS jáne joǵary oqý oryndary bazasynda IRAP ulttyq bilim platformasy qurylady. Sondaı-aq, IRAP-ty engizý boıynsha ulttyq zańnamaǵa ózgeristerdi engizý jónindegi usynystar daıyndalatyn bolady.
Baǵalaý jumystary tamyz aıynyń basynda Almaty oblysy men Almaty qalasynda júrgizile bastady. Atalmysh sharalar qyrkúıek jáne qazan aılarynda Aqmola, Soltústik Qazaqstan, Qostanaı, Aqtóbe, Qyzylorda, Túrkistan, Jambyl jáne Almaty oblystarynda jalǵaspaq.