Qazaqstanda jol bıtýmy ne sebepti qymbattady

NUR-SULTAN. QazAqparat – Qazaqstan Reseıden 300 myń tonna jol bıtýmyn satyp alýy múmkin. Bul týraly Indýstrııa jáne ınfraqurylymdyq damý mınıstrligi baspasóz qyzmetinen málim boldy, dep habarlaıdy QazAqparat tilshisi.

«2022 jyly avtojol jobalaryn iske asyrý úshin shamamen 1,1 mln tonna jol bıtýmy qajet. Osy oraıda respýblıkalyq jelige 600 myń tonna, jergilikti jelige 500 myń tonna kerek. Otandyq bıtým zaýyttarynyń qazaqstandyq naryqtyń qajettiligin jol bıtýmymen tolyq qamtamasyz etýge múmkindigi joq. Qazirgi ýaqytta elimizde jylyna 1 mln tonnadan aspaıtyn kólemde jol bıtýmyn óndirýshi 4 zaýyt («Caspi Bitum», «PNHZ», «Qazaq Bitum», «Asfaltobeton-1») jumys isteıdi», - delingen mınıstrliktiń QazAqparat agenttigine bergen jaýabynda.

Jol bıtýmdary negizinen jol-qurylysy salasynda, aerodrom alańdaryn salý, jóndeý úshin jáne basqa da qurylys salalarynda qoldanylatynyn atap ótken jón.

«Qazirgi kezde mınıstrlik aýqymdy jol salasyndaǵy jobalardy iske asyryp jatyr. Sonymen qatar basqa da memlekettik organdar «Jumyspen qamtýdyń jol kartasy» jáne «Aýyl – el besigi» baǵdarlamalaryn iske asyrýǵa qarajat bólip, qurylys jumystary eskerilgen. Bul turǵyda qurylys maýsymynda treıderler (alypsatarlar) jasandy tapshylyq jasap, bıtým baǵasynyń 2 ese qymbattaýyna áser etetinin eskerý qajet. Bul rette, bıtým tapshylyǵyna baılanysty mınıstrlik Reseıden 300 myń tonna kóleminde jol bıtýmyn jetkizý týraly máseleni pysyqtap jatyr. Búgingi tańda bul máseleni Qazaqstannyń Energetıka mınıstrligi Reseı Energetıka mınıstrligimen birlesip qarastyryp otyr», - dep atalyp ótken vedomstvo málimetinde.

Budan buryn habarlanǵandaı, bıyl Úkimettiń keńeıtilgen otyrysynda Prezıdent Qazaqstanda 200 myń tonna bıtým jetispeıtinin aıtyp, osy saladaǵy kemshilikterdi synǵa aldy.