Qazaqstanda jylqy sharýashylyǵy ınstıtýty qurylady
«Qazaqstanda jylqynyń birneshe túri bar. Onyń ishinde qazaqpen birge jasap kele jatqan jabynyń orny erekshe. Keıin oǵan Qostanaı, Kóshim jáne Muǵaljar tuqymdary qosyldy. Árqaısysynyń óz ereksheligi bar. Men buǵan deıin Adaı jylqysy Mańǵystaýdyń baǵa jetpes qazynasy ekenin aıttym. Ony álemge tanytý úshin naqty sharalar qabyldaýdy tapsyrdym. Qazir Adaı jylqysy resmı túrde bólek tuqym retinde tirkeldi. Bul arǵymaqtar Uly dala joryǵynda, basqa da alaman báıgelerde top jaryp júr», — dedi Prezıdent.
Memleket basshysy Qostanaı jylqysy da myqty ekenin, alaıda, joǵalyp ketýdiń az-aq aldynda turǵanyn, nebári 280 bas qalǵanyn aıtty.
«Sondyqtan jylqynyń sanymen qatar, sapasyn arttyrý — mańyzdy mindet. Bıyl qazaq jylqysynyń tuqymyn saqtaý jáne kóbeıtý úshin arnaıy zań qabyldadyq. Endi bul baǵytta taǵy bir mańyzdy qadam jasaımyz. Men Úkimetke Jylqy sharýashylyǵy ınstıtýtyn qurýdy tapsyramyn. Bilikti mamandar muny kópten beri aıtyp júr. Quzyrly organdar qysqa merzim ishinde osy máseleni pysyqtap, qarjy kózderin naqtylaýy kerek», — dedi Qasym-Jomart Toqaev.