Qazaqstanda jer qansha turady
Atap óterlik jaıt, eń tómengi baǵa men eń joǵarǵy baǵa arasyndaǵy alshaqtyq tym úlken. Jer telimderiniń quny qansha turatynyn jan-jaqty ashyp kórsetý úshin oblys ortalyǵynyń aýmaǵyna kiretin jáne odan tys terrıtorııadaǵy jeke turǵyn úı salýǵa arnalǵan jer ýchaskeleri, sondaı-aq aýyl sharýashylyǵy maqsatyndaǵy jer ýchaskeleri mysalǵa alyndy.
Jeke turǵyn úı salýǵa arnalǵan jer telimderi qansha turady?
Jeke turǵyn úı qurylysynyń baǵasy kóp jaǵdaıda ınfraqurylymnyń bar-joǵyna, ınjenerlik jáne kommýnıkatsııalyq jelilerdiń tartylǵanyna, ornalasqan jerine (qala aýmaǵynda álde qala syrtynda ornalasýy) baılanysty qalyptasady. Keıbir ýchaskeler arhıtektýralyq qurylymymen satylady, bundaı jaǵdaıda baǵasy da joǵary bolatyny túsinikti.
Sholýdy ázirleý barysynda satylatyn jer telimderiniń eń jıi kezdesetin aýmaǵyna mán berildi. Jyljymaıtyn múlik satý jarnamalary ornalastyrylǵan saıttardaǵy derekterge súıensek, bul — eshteńe salynbaǵan 6 jáne 10 sotyq jerler.
Basqa óńirlermen salystyrǵanda jer ýchaskeleri Túrkistanda, Óskemende, Jezqazǵan jáne Petropavlda arzanyraq. Máselen, Túrkistanda 6 sotyq jerdiń ortasha baǵasy 5 mln teńge, al 10 sotyq jer shamamen 14-15 mln teńge turady. Qala mańynda sál arzanyraq — 2,5 mln teńge.
Óskemende 6 sotyq jer ortasha alǵanda 5,4 mln teńge, 10 sotyq jer 11 mln teńge turady. Qala mańyndaǵy jerler bolsa 450 myń men 3,5 mln teńge arasynda satylady.
Jezqazǵanda aýmaǵy 6 sotyq jerdi 5,5 mln teńge shamasynda satyp alýǵa bolady. Al 10 sotyq jer ortasha eseppen 12,6 mln-ǵa baǵalanady.
Petropavlda 6 sotyq jer 6 mln turady. 10 sotyq jer qala aýmaǵynda 9 mln-ǵa, qala mańynda 600 myńnan saýdalanady.
Qonaev qalasynda 6 sotyq jer alý úshin satyp alýshy 7 mln teńge tóleýi kerek. Al 10 sotyq jerge 18 mln shyǵyndaýyna týra keledi. Saıajaı aýmaǵynda jáne qala mańynda baǵa sál tómen — 1,5 mln teńgeden bastalady.
Pavlodarda 6 sotyq jerdiń baǵasy 7 mln teńge shamasynda tur. 10 sotyq jer bolsa, 15 mln teńgege shyǵady. Qala terrıtorııasynyń syzyǵynan syrt jerdegi ýchaskeler munda da arzanyraq bolady: 10 sotyǵy — 1 mln teńge.
Taldyqorǵanda 6 sotyq jerdiń ortasha baǵasy 7,5 mln teńgege jetedi. Qala mańyndaǵy jer bolsa, 2 mln teńgeden bastalady. 10 sotyq jer qala aýmaǵynda 12-15 mln teńge turady. Al saıajaılarda 1 mln teńgege baǵalanady.
Semeıde 6 sotyq jer keıbir qalalarmen salystyrǵanda joǵary turǵany baıqalady. 6 sotyq jerdiń baǵasy 9 mln-ǵa jetedi. 10 sotyq bolsa — 13 mln teńge. Qala mańyndaǵy jerler 800 myńnan bastalyp satylady.
Aqtóbede 6 sotyq jer ortasha alǵanda 9,5 mln teńge, qala syrtynda 2-3,5 mln teńge turady. Qalada basym suranysqa ıe — 10 sotyq jer, onyń quny 13 mln teńge turady. Al qala syrtynan jer alýshy 400 myńnan joǵary sýmma tóleıdi.
Kókshetaýda bolsa, 6 sotyq jerdiń ortasha baǵasy 9,7 mln teńge. 10 sotyqtyń ortasha baǵasy 15 mln teńge shamasynda. Al qala mańyndaǵy jerler 2,5-4 mln teńge arasynda satylady.
Qyzylordalyqtar 6 sotyq jerdi 10 mln teńgeden satyp alyp júr. Al 10 sotyq jer alý úshin qaltańda 12-13 mln teńgeń bolýy kerek. Qala syrtyndaǵy jerler 400 myń shamasynda baǵalanady.
Qostanaıda da 6 sotyq jerdiń baǵasy osyǵan uqsas — 10 mln teńge. Al 10 sotyq jer áldeqaıda qymbat — 22 mln teńge.
Qaraǵandyda 6 sotyq jer shamamen 12 mln teńge turady. Kommýnıkatsııa tartylǵan-tartylmaǵanyna baılanysty saıajaılardaǵy dál osy aýmaqtaǵy jer 500 myń men 1,2 mln teńge arasynda satylady. Qala aýmaǵynda 10 sotyq jer 28 mln, al qala syrtynda 1,5 mln teńge turady.
Atyraýda 6 sotyq jer 12 mln teńgege baǵalanady. 10 sotyq bolsa, 16,5 mln teńgeden satylýda. Qala mańyndaǵy jer bolsa, 800 myń men 5 mln teńge arasynda saýdalanady.
Tarazda 6 sotyq jerdiń baǵasy 12-13 mln teńge bolady. Al saıajaılarda jáne qala mańynda 2-3,5 mln arasynda baǵalanady. 10 sotyq jer bolsa, ortasha alǵanda 18-20 mln turady. Qala mańyndaǵy jerlerdiń baǵasy 2,5 mln teńgeden bastalady.
Oralda eshteńe salynbaǵan taza 6 sotyq jer 15,4 mln teńge turady. Al qala syrtyndaǵy jáne saıajaılardaǵy jerdiń baǵasy 1,1 mln teńgeden bastalady. 10 sotyq jerge keler bolsaq, onyń baǵasy ortasha eseppen 35 mln teńge bolady, al qala mańynda — 1,5 mln teńge.
Aqtaýda jeke turǵyn úı qurylysyna arnalǵan 6 sotyq jerdiń ortasha baǵasy 18 mln, 10 sotyq jerdiń baǵasy 25 mln teńge shamasynda. Al qala syrtyndaǵy jerler qaladan qanshalyqty alystyǵyna jáne teńiz jaǵalaýyna jaqyndyǵyna baılanysty 1,5-6 mln teńge arasynda satylady.
Megapolısterdegi jer baǵasy
Turǵyndarynyń sany bir mıllıonnan asatyn elimizdegi úsh qalada baǵa basqa óńirlerge qaraǵanda joǵary.
Shymkentte 6 sotyq jer alý úshin 18-20 mln teńge shyǵyndaısyń. 10 sotyq alý úshin tipti 25-27 mln teńgeń bolýy shart. Qala syrtynda 10 sotyq jer 2 mln teńgeden bastalady.
Astanada 6 sotyq jerdiń ortasha baǵasy 33 mln teńge, deıturǵanmen keıbir 6 sotyq jerler 90 mln-ǵa satylyp tur. Qala syrtyndaǵy baǵa 1,2 mln teńgeden 10 mln-ǵa deıin qubylady. Al 10 sotyq jer ortasha eseppen 46-48 mln teńge turady, alaıda 110 mln teńgelik jer ýchaskeleriniń de jarnamasyn keziktirýge bolady. Al qala mańyndaǵy jerlerdiń baǵasy 2 mln teńgeden bastalady.
Almatyda 56 mln teńgeń bolmasa, 6 sotyq jer satyp ala almaısyń. Qala mańyndaǵy jerler 2,5 mln teńgeden bastalady. Qala ishinde 10 sotyq jer 90 mln teńge shamasynda turady. Qala mańyndaǵy jerler bolsa (taý etegi jáne jekelegen aýdandar) 3,5 mln teńgeden bastap satylady.
Oblystarda aýyl sharýashylyǵy jerleriniń baǵasy qanshadan?
Óńirlerdegi sharýa qojalyqtary jerleri baǵasynyń qalyptasýyna onyń aýmaǵy, jaıylymynyń bar-joǵy sekildi krıterııler áser etedi.
Soltústik Qazaqstan oblysynda satylymdaǵy aýyl sharýashylyǵy maqsatyndaǵy jerlerdiń aýmaǵy 13-506 gektar arasynda jáne baǵalary 1 mln-nan 30 mln-ǵa deıin jetedi. Máselen, 71 ga jer 5,7 mln teńgeden satylyp tur.
Aqmola oblysynda satylymdaǵy jerlerdiń aýmaǵy 1 gektar men 11,8 myń gektar arasynda. Baǵasy 1 mln-nan 875 mln teńgege deıin barady. Jarnamalardyń kóbinde 10 gektarǵa deıingi aýmaqtaǵy jerdiń satylatyny, baǵasy 20-22 mln teńge ekeni jazylǵan.
Ulytaý oblysynda satylatyn aýyl sharýashylyǵy jerleriniń aýmaǵy 318 gektardan 5000 gektar arasynda qubylady. Olardyń baǵasy 1 mln teńgeden bastalyp, 20 mln teńgege jetedi. Máselen, 318 gektar jer 4,5 mln teńgege, 5000 gektar jaıylym 1 mln teńgege satylyp tur.
Aqtóbe oblysynda 1,5 gektardan 30 myń gektar aralyǵynda jerler satylýda. Baǵasy 3-350 mln teńge arasynda ózgeredi.
Atyraý oblysynda aýyl sharýashylyǵy jerleriniń aýmaǵy 1,6 gektardan 1,2 myń gektarǵa deıin ósedi. Baǵasy — 1,6-450 mln teńge arasynda.
Túrkistan oblysynda aýyl sharýashylyǵy jerlerinde tańdaý kóp. Munda aýmaǵy 1 gektardan 1,5 myń gektarǵa deıingi jerlerdi 1,9 mln-nan 230 mln-ǵa deıingi aralyqta alýǵa bolady. Kóp jaǵdaıda jerdiń quny onyń ornalasýyna baılanysty belgilenedi.
Taý bókterinen 230 mln teńgege 100 gektar jer satyp alýǵa bolady nemese 2-5 mln teńge arasynda 1-20 gektar aýmaǵynda shaǵyn jer ýchaskeleri satylady.
Pavlodar oblysynda 1 gektardan 3775 gektarǵa deıingi aýmaqtaǵy jerler 1-50 mln teńge arasynda satylady. Mysaly, 152 gektar jer ýchaskesi 15 mln-ǵa, Baıanaýylda taý bókterindegi 1600 gektar jer 25 mln-ǵa saýdalanyp tur.
1,3 gektardan 1,5 myń gektarǵa deıingi jer ýchaskeleri Shyǵys Qazaqstan oblysynda 1-200 mln teńge arasynda baǵalanady. Kóp jaǵdaıda bir gektardyń baǵasy 1 mln teńge shamasynda kezdesedi. Mysaly, Katonqaraǵaıda 98 gektar jer 98 mln-ǵa satylyp tur.
Mańǵystaý oblysynda 1 gektardan 123 myń gektarǵa deıingi jerlerdiń jarnamasyn keziktirýge bolady. Qymbattary Kaspııdiń jaǵalaýynda ornalasqan. Baǵalary 1,2 mln men 50 mln teńge arasynda ózgeredi.
Qyzylorda oblysynda 5 gektardan 1000 gektarǵa deıingi jerlerdi 1,2-80 mln teńge arasynda satyp alýǵa bolady. Máselen, sý qoımasyna jáne saıajaıǵa jaqyn jerdegi 20 gektar jerdi satýshy 80 mln teńge surap tur. Al baqshaǵa qolaıly topyraǵy qunarly 29 gektar jer 47 mln teńgeden tur.
Jambyl oblysynda 3 gektardan 1,3 myń gektarǵa deıingi aýmaqtaǵy jerlerdiń baǵasy 1,8-264 mln teńge arasynda satylyp jatyr.
Eginshilikke de, mal ósirýge de klımaty qolaıly Qostanaı oblysynda 8 gektardan 10 myń gektarǵa deıingi jerler satylymǵa shyǵarylǵan. Baǵasy 900 myńnan 55 mln-ǵa deıingi aralyqta. Máselen, Arqalyq mańynda aýmaǵy 10 myń gektar 50 mln teńge dep tur.
Batys Qazaqstan oblysynda 1 gektardan 1,4 myń gektarǵa deıingi aýmaqtaǵy jerlerdi satyp alýǵa bolady. Baǵasy 1,5-120 mln teńge arasynda.
Abaı oblysynda 5 gektardan 1,3 myń gektarǵa deıingi aralyqta jerler satylýda. Quny 3 mln-nan 60 mln-ǵa deıin ósedi. Máselen, 50 gektar jer 34 mln teńgege baǵalanǵan, al aýmaǵy 1,3 myń gektar jer 22 mln dep tur.
Almaty oblysynda baǵa basqa óńirlerge qaraǵanda joǵary: 1 gektardan 10 myń gektarǵa deıingi aralyqtaǵy jerlerdiń baǵasy 400 myńnan 7,8 mlrd-qa deıin sharyqtaıdy.
Qaraǵandy oblysynda 2 gektardan 7,5 myń gektarǵa deıingi jer telimderi 3-200 mln teńge arasynda satylýda. Óńirdegi eń quny joǵary jarnamany alsaq, 7,5 myń gektar jaıylym 200 mln teńgege baǵalanatyny jazylǵan.
Jetisý oblysynda saýdaǵa qoıylǵan 2 gektardan 2 myń gektarǵa deıingi aýmaqtaǵy jer telimderin keziktirýge bolady. Baǵasy 1,2 mln-nan 950 mln-ǵa deıingi aralyqta. Eń qymbat usynysty alsaq, shekaranyń jáne qurǵaq porttyń janynda ornalasqan 50 gektar jer 950 mln teńgege satylyp tur.