Qazaqstanda Jeńistiń 70 jyldyǵy aıasynda 50-den astam is-shara ótedi

ASTANA. QazAqparat - QR Úkimetiniń Qaýlysyna sáıkes bekitilgen Qazaqstan Respýblıkasynda Jeńistiń 70 jyldyǵyna daıyndyq jáne ótkizý jónindegi is-sharalar josparynda 50-den astam shara qarastyrylǵan. Bul týraly QR Densaýlyq saqtaý jáne áleýmettik damý mınıstrliginen habarlandy.

Atap aıtqanda, osy sharalardyń aıasynda soǵys ardagerlerin «1941-1945 jyldardaǵy Uly Otan soǵysyndaǵy Jeńiske 70 jyl» mereıtoılyq medalimen marapattaý; Astana qalasynda soǵys ardagerleriniń jáne tyl eńbekkerleriniń qatysýymen Otan qorǵaýshylar kúnine jáne Jeńistiń 70 jyldyǵyna arnalǵan áskerı sherý ótkizý; buǵan deıin baspana almaǵan soǵysqa qatysqandar men múgedekterdi baspanamen qamtamasyz etý; soǵysqa qatysqandar men múgedekterge turmystaryna kómek kórsetý jáne úılerine jóndeý jumystaryn júrgizýdi qarastyratyn «Ardaǵym - ardagerim» aktsııasyn ótkizý qamtylǵan.

Sonymen qatar Uly Otan soǵysy ardagerlerin áleýmettik qoldaýdyń qosymsha túrleri uıymdastyrý, ıaǵnı Qazaqstan Respýblıkasy aýmaǵynda jáne TMD elderine temir jol jáne áýe kóligimen bir ret tegin baryp-qaıtýyn qamtamasyz etý, UOS-qa qatysqandar men múgedekterine shıpajaıda emdelýdi usyný, sondaı-aq basqa la birqatar is-sharalar uıymdastyrý eskerilgen.

Munymen qosa, saltanatty jıyndar, kontsertter, kezdesýler, kitaptardyń tusaýkeserleri, foto jáne kitap kórmeleri, spektaklder, stýdentter men oqý oryndary oqýshylarynyń, jastar uıymdarynyń qatysýymen merekelik sherýler ótkizý josparlanýda.

2015 jylǵy 1 qańtardaǵy jaǵdaı boıynsha, Qazaqstanda 5 037 - Uly Otan soǵysyna qatysqandar men múgedekter, 1 434 - Jeńiske qosqan úlesi úshin Uly Otan soǵysyna qatysqandar men múgedekterge teńestirilgen tulǵalar, 195 - qaıtys bolǵan (iz-tússiz joǵalyp ketken) sarbazdardyń jesirleri turady.