Qazaqstanda jeńil ónerkásip óndirisiniń 3 aıdaǵy kólemi 37,8%-ǵa ulǵaıdy
Bıyl 10-shy sáýirde QR Indýstrııa jáne ınfraqurylymdyq damý mınıstriniń buıryǵy kúshine enip, soǵan sáıkes jeńil ónerkásip boıynsha iske asyrylatyn ınvestıtsııalyq jobalarǵa baılanysty 3%-dyq syıaqy mólsherlemesinde qarjylaı qoldaý tetigi qarastyrylǵan.
3%-dyq paıyzdyq mólsherlememen zaıymdyq aqshany usyný otandyq jeńil ónerkásipti qarjylaı turǵyda qoldaýdyń jańa túri. Onyń operatory «Ónerkásipti damytý qory» AQ sanalady. Bul tetik shaǵyn jáne orta bıznesti yntalandyrýǵa baǵyttalyp, orta jáne joǵary bólinistegi taýarlardy óndiretin, sondaı-aq ishki naryqtan shıkizat satyp alýdy kózdeıtin kásiporyndarǵa basymdyq berilmek.
Ekonomıkalyq qyzmet túrleriniń jalpy jiktelýine sáıkes kelesideı qyzmet túrlerin júzege asyratyn kásiporyndar tıisti qarajatty alýǵa múmkindigi bar:
- toqyma buıymdarynyń óndirisin jolǵa qoıǵan (EQJJ 13-bólimi);
- kıim óndiretin (EQJJ 14-bólimi);
- bylǵary jáne oǵan qatysty ónimderdi shyǵaratyn kásiporyndar (EQJJ 15-bólimi).
Bul rette bir jobaǵa qarastyrylatyn zaıymdyq aqshanyń shekti mólsheri – 5 mlrd teńge.
Sondaı-aq mańyzdy sharttardyń biri óndiristi jańǵyrtý kezinde kem degende 30 adamdy, al jańa óndiristi qurǵan shaqta 80 adam jumyspen qamtamasyz etilýge tıis.
Keıingi málimetterge súıensek, qazir ınvestıtsııalyq jobalar pýlynda jeńil ónerkásipke qatysty 60-qa jýyq joba bar. 2025 jylǵa deıin júzege asyrylatyn osy jobalar boıynsha 10 myń jumys ornyn ashý josparlanǵan.
«Jeńil ónerkásip adamnyń ómirinde úlken mańyz alatyn sala. Nege deseńiz, tutyný kólemi jaǵynan atalǵan sektor ekinshi orynda keledi, sondaı-aq halyqty jumyspen qamtıtyn áleýmettik turǵyda ótei mańyzdy sala sanalady. Bizdiń aldymyzǵa respýblıkadaǵy barlyq shıkizatty daıyn ónimge deıin óńdep, shyǵarý mindeti qoıylǵan» dedi QR IIDM Indýstrııalyq damý komıteti tóraǵasynyń mindetin atqarýshy Oljas Saparbekov.
2023 jyldyń qańtar-naýryz aralyǵynda elimizde 55,5 mlrd teńge somasyna jeńil ónerkásip ónimi óndirilip, bul byltyrǵy kezeńmen salystyrǵanda 37,8%-ǵa kóp. Sonymen qatar óndiristi úzdiksiz jalǵastyryp kele jatqan kásiporynnyń sany 2022 jylmen salystyrǵanda 9%-ǵa nemese 122 nysanǵa ulǵaıǵany baıqalyp otyr.
Jeńil ónerkásiptegi óndiris ósimi onyń barlyq túrinde tirkeldi: toqyma buıymdaryn óndirý 57,6%-ǵa, kıim óndirisi 11,7%-ǵa, bylǵary jáne oǵan qatysty ónimdi shyǵarý 7,4%-ǵa artqan.
Bul baǵytta óńirler arasynda Túrkistan oblysy (28,5%), Shymkent (16%) jáne Almaty qalalary (8%) men Aqmola oblysy (5,6%) kósh bastap keledi.
Sóz oraıy kelgende aıta keteıik, Qazaqstanda jeńil ónerkásip baǵytynda
1445 kásiporynnyń qyzmeti jolǵa qoıylyp, 22 myń adam eńbek etip keledi.