Qazaqstanda jemqorlyqqa qarsy táýelsiz keńes quryldy
Bul týraly búgin Almatyda ótken baspasóz máslıhatynda keńes músheleri málim etti.
Keńesti qurýǵa bastamashy bolǵan «Ortalyq Azııanyń Eýrazııa qorynyń» prezıdenti Djeff Erlıhtiń aıtýynsha, keńestiń maqsaty Qazaqstanda sybaılastyq deńgeıin tómendetý baǵytynda qoǵamdyq uıymdardy, táýelsiz sarapshylardy jáne iskerlik toptardyń ókilderin biriktirý bolyp tabylady. Qazirgi kezde keńes quramyna 15 qoǵamdyq uıym kirgen.
«Sybaılastyqqa qarsy yqpal etýde qoǵamdyq uıymdardyń qyzmetin damytý kerek, óıtkeni sybaılastyqty qoǵamnyń qatysýynsyz jeńý múmkin emes. Osyǵan deıin elimizde memlekettik organdar ǵana jemqorlyqpen kúresip keldi. Óıtkeni úkimettik emes uıymdardyń ortaq uıymy bolǵan joq. Keńes osy olqylyqtyń ornyn toltyrady», deıdi «Aman-saýlyq» qoǵamdyq qorynyń prezıdenti Baqyt Túmenova.
Djeff Erlıhtiń sózine qaraǵanda, keńes qazirdiń ózinde jumysyn bastap ketken. Jumystyń bastamasy retinde keńes músheleri Grýzııa, Moldova, Estonııaǵa baryp, olardyń ÚEU-larynyń sybaılastyqpen kúres tájirıbesimen tanysyp qaıtqan. Kezdesý qorytyndysy boıynsha qazaqstandyq keńes aldaǵy ýaqytta 4 baǵyt boıynsha jumys isteýdi sheshken. Buǵan sáıkes sybaılastyqtyń el ekonomıkasyna jáne qoǵamdyq qatynastarǵa yqpalyn zertteý, zańdardyń qoldanys deńgeıin anyqtaý, sybaılastyqqa qarsy memlekettik baǵdarlamalardy baǵalaýǵa azamattardyń qatysýyn keńeıtý, memlekettik organdardyń sybaılastyqpen kúreste tıimdiligin anyqtamaq.