Qazaqstanda jemqorlardyń reestiri paıda bolýy múmkin

<p>ASTANA. KAZINFORM &ndash; Májilis janyndaǵy qoǵamdyq palata músheleri parlamentshilermen jáne sarapshylarmen birlesip sybaılas jemqorlyqqa qarsy is-qımyl máseleleri jónindegi zań jobasyn jáne oǵan ilespe túzetýlerdi talqylady. Otyrys Májilis depýtaty Aıdos Sarymnyń tóraǵalyǵymen jáne Májilistiń vıtse-spıkeri Dánııa Espaevanyń qatysýymen ótti. 3 kodeks pen 5 zańǵa ózgerister men tolyqtyrýlar engiziledi. Negizgi ózgeristerdiń qatarynda sybaılas jemqorlardyń reestrin engizý jáne para berý týraly usynys pen ýáde úshin qylmystyq jaýapqa tartý qarastyrylǵan.</p>

Zań jobalary normalarymen Sybaılas jemqorlyqqa qarsy is-qımyl agenttigi tóraǵasynyń birinshi orynbasary Ulan Sarqulov tanystyrdy. Ol túzetýler arqyly sybaılas jemqorlyqqa qarsy saıasat tujyrymdamasy ishinara iske asyrylatynyn atap ótti. Negizgi zań jobasy 6 baǵytty qamtıdy. Olardyń qatarynda sybaılas jemqorlardyń jarııa tizilimin engizý, usynys pen ýáde úshin qylmystyq jaýapqa tartý. Sondaı-aq, para alýǵa, suraýǵa nemese talap etýge kelisim berý taǵy sol sııaqty. Ózgerister men tolyqtyrýlar 3 kodekske, 5 zańǵa jáne ákimshilik kodekske engiziledi.

Baıandamany tyńdaǵannan keıin qoǵamdyq palata músheleri men shaqyrylǵan qatysýshylar túzetýlerge qatysty óz pikirlerin bildirdi.

Qazaqstandaǵy parlamentarızmdi damytý qorynyń prezıdenti Záýresh Battalova zań jobasyn qoldady. Onyń pikirinshe, bastama ýaqyt talaptaryna sáıkes keledi, alaıda usynylǵan normalardy tıimdilik turǵysynan qaıta qaraý qajet.

«Zań jobasyn tujyrymdamalyq turǵydan qaıta qarap, eldegi sybaılas jemqorlyqtyń deńgeıin tómendetýge jáne aldyn alýǵa ne áser etýi múmkin ekenin jalpy talqylaý qajet. Bul rette qazirgi redaktsııada joq azamattyq qoǵamnyń qatysý tetikteri kózdelgeni mańyzdy. Sonymen qatar, naýryz aıynan bastap «Qoǵamdyq baqylaý týraly» zań kúshine enedi», – dep atap ótti Záýresh Battalova.

Sonymen qatar zań jobasynda iskerlik jáne saıası sybaılas jemqorlyq jónindegi normalardyń joqtyǵyna nazar aýdardy. Odan bólek, Z. Battalova zań normalaryna túzetýler engizýmen birge sybaılas jemqorlyqpen kúreste saraptamanyń rólin kúsheıtý qajet ekenin atap ótti.

Zań jobalaryn ońtaılandyrý boıynsha Májilis depýtattary Marat Báshimov pen Ekaterına Smyshlıaeva, «Ádildik joly» qoǵamdyq birlestiginiń dırektory Dıdar Smaǵulov, «Jańarý» sybaılas jemqorlyqqa qarsy jalpyulttyq qozǵalys basshysy Mels Semǵalıev taǵy da basqa jıynǵa qatysýshylar pikirlerin bildirdi.

Almaty joǵary basqarý mektebiniń prezıdenti Qanat Nurov bopsalaý arqyly para alyp nemese para bergeni úshin qylmystyq jaýapkershilikti naqtylaý qajet deıdi. Óıtkeni amal joqtyǵynan para berýshiler tergeýshimen tildespeı turyp, aıyptaý baby boıynsha birden qamaýǵa alynady.
Saıasattanýshy Danııar Áshimbaev quqyq qoldaný praktıkasynyń problemalaryna toqtaldy.

Mysal retinde «ákim laýazymyn satý týraly» belgili isti keltirdi. ıAǵnı ákim bolǵysy keletin adam aqsha úshin zardap shekken dep tanyldy, biraq sybaılas jemqorlyq quqyq buzýshylyq jasaǵany úshin jaýapqa tartylmady.

«Atyshýly isterge qatysty quqyq qoldaný praktıkasyn taldaý engizilse. Áıtpese zańdar jazylady, al oryndalýy absýrdqa ákelip jatady. Normalardy qatańdatýǵa qatysty zańnamalarǵa ózgeris engizbes buryn, osyǵan deıin is júzinde qaı jerlerden qate ketkenin qarastyraıyq», – deıdi saıasattanýshy.

Jıyndy qorytyndylaı kele Aıdos Sarym talqylaýǵa qatysýshylardy sybaılas jemqorlyqqa qarsy is-qımyl jónindegi zań jobalary boıynsha belsendi jumys isteýge shaqyrdy.
Sondaı-aq, Májilis janyndaǵy qoǵamdyq palatanyń quramy jańartyldy. Bolatbek Nájimetdınuly men Gaýhar Tanashevanyń ornyna Juldyz Súleımenova men Irına Smırnova keldi.