Qazaqstanda jemis pen kókónis baǵasy arzandady

NUR-SULTAN. QazAqparat - Qazaqstanda 2019 jyldyń sáýir aıyndaǵy azyq-túlik baǵasy 2018 jyldyń sáýir aıymen salystyrǵanda 7,1% -ǵa ósti, dep habarlaıdy QazAqparat Ulttyq ekonomıka mınıstrliginiń Statıstıka komıtetine silteme jasap.

Esepti kezeńde toqash ónimderi men dándi daqyldar, et, balyq jáne teńiz ónimderi, sút ónimderi, jumyrtqa, maı jáne qant, kondıterlik ónimder, alkogolsiz sýsyndar men alkogol ónimder qymbattap, jemister men kókónister arzandady.

Atap aıtqanda, astyq ónimderi baǵasynyń ózgergeni baıqalady. Bıylǵy jyldyń sáýir aıynda kúrishtiń ortasha baǵasy 1 kılogrammǵa - 333 teńgeni qurasa, ótken jyldyń osy kezeńinde 290 teńge, al qaraqumyqtyń baǵasy bıyl - 243 teńge, byltyrǵy jyldyń osy kezeńinde - 266 teńge bolǵan.

Sáýir aıynda túıirshiktelgen qanttyń ortasha baǵasy 1 kılogramǵa - 243 teńgeni, bir jyl buryn - 203 teńgeni qurady.

Et jáne et ónimderinen sıyrdyń jaýyryn-keýde bóliginiń baǵasy 2019 jyldyń sáýir aıynda 1 kılogrammǵa - 1575 teńgeni qurady (2018 jyldyń sáýir aıynda - 1496 teńge) súıekti qoı eti - 1 502 teńge (1 403 teńge), jylqy eti - 1 789 teńge (1 641 teńge), shoshqanyń jaýyryn eti - 1 342 teńge (1 258 teńge), shala qaqtalǵan shujyq - 2 071 teńge (1 895 teńge), taýyq eti - 753 teńge (654 teńge).