Qazaqstanda jeke operatorlardy qurý barynsha qıyndatyldy

NUR-SULTAN. QazAqparat – Memleket basshysynyń tapsyrmasymen memlekettik jáne jeke operatorlardyń qyzmeti retteldi jáne sany qysqartyldy. Bul týraly QR Básekelestikti qorǵaý jáne damytý agenttiginiń tóraǵasy Serik Jumanǵarın aıtyp berdi, dep habarlaıdy QazAqparat.

«Kelesi mańyzdy qadam – Memleket basshysynyń tapsyrmasymen memlekettik jáne jeke operatorlardyń qyzmetin retteý boldy. Ótken jyly 9 operatordy qysqartý boıynsha jumys júrgizildi, onyń beseýi vedomstvolyq baǵynysty uıym retinde qalyp otyr, tórteýi jekeshelendirildi nemese qysqartylýǵa jatady. «Operator ROP» JShS fýnktsııalary «Jasyl damý» AQ berildi jáne qazirgi ýaqytta operator bar, onyń ishinde 2-ýi jekemenshik», - dedi S. Jumanǵarın Básekelestikti qorǵaý jáne damytý agenttigi alqasynyń otyrysynda.

Monopolııaǵa qarsy besinshi pakette memlekettik monopolııa tetigin tolyqtyratyn «arnaıy quqyq» ınstıtýtyn qurý qarastyrylǵan.

«Zań arqyly jeke operatorlardy qurý protsedýrasy barynsha qıyndatyldy. Buǵan memlekettiń 100% qatysýymen zańdy tulǵalardy qurý múmkin bolmaǵan jaǵdaılarda ǵana jol beriledi. Úkimet agenttikpen birlesip, jeke sýbektilerge qatysty mindetti konkýrs ótkizý týraly talap bekitilgen, operatorlardy aıqyndaý tártibin keminde 5 jylda bir ret mindetti konkýrs ótkizý týraly talap bekitildi. Memleket basshysynyń tapsyrmasyn eskere otyryp, bul norma jeke operatorlardy qurýǵa tolyq zańnamalyq tyıym salý paıdasyna qaıta qaralatyn bolady», - dedi S. Jumanǵarın.

Buǵan deıin Serik Jumanǵarın Básekelestikti damytý máseleleri boıynsha zań aıasynda qandaı jańalyqtar engizilgenin túsindirgen edi .