Qazaqstanda jeke áskerı kompanııalar qurylmaıdy - Sultan Qamaletdınov

ASTANA. QazAqparat – Qazaqstanda jeke áskerı kompanııalar qurylmaıdy. Bul týraly Qorǵanys mınıstriniń orynbasary Sultan Qamaletdınov málim etti, dep habarlaıdy QazAqparat tilshisi.

«Qazaqstanda jeke áskerı kompanııalardy qurýdyń normatıvtik-quqyqtyq bazasy eskerilmegen. Meniń oıymsha, elimizge mundaı kompanııalar kerek emes. Atap aıtqanda, memleket qaýipsizdik baǵytynda qarýly kúshterdi, basqa da áskerlerdi, áskerı jasaqtardy qamtamasyz etedi. Sonymen qatar, Konstıtýtsııada qaýipsizdikti qamtamasyz etetin basqa qurylymdar qamtylmaǵan», - dedi Sultan Qamaletdınov Senatta tilshilerdiń suraǵyna jaýap bere otyryp.

Budan buryn habarlanǵandaı, Sultan Qamaletdınov qarý-jaraq pen áskerı tehnıkany memlekettik satyp alý boıynsha tıisti jospar bar ekenin aıtty.

Sonymen qatar bıyl áskerı saladaǵy oqytýshylar men dárigerlerdiń jalaqysy ósedi.